Лічаныя дні застаюцца да хвалюючага моманту, калі навучальныя ўстановы раёна ўрачыста адчыняць свае дзверы перад ушацкімі школьнікамі. Пра тое, як прайшоў перыяд падрыхтоўкі да навучальнага года, пра сюрпрызы і новаўвядзенні, якія чакаюць сёлета бацькоў і вучняў, – наша размова з начальнікам аддзела адукацыі, спорту і турызму райвыканкама Інай Фёдараўнай СЫРОЎЧАНКАЙ.
– Апошнім часам, на жаль, новы навучальны год прыносіў звесткі аб закрыцці вясковых школ. Як абстаяць справы з сеткай устаноў адукацыі сёлета?
– У 2015 годзе нам удалася яе цалкам захаваць. У раёне будуць функцыянаваць 9 школ і 7 – садоў. І адбылося гэта найперш таму, што на Ушаччыне не зменшылася колькасць вучняў. На ўрачыстыя лінейкі, якія ва ўсіх школах пачнуцца 1 верасня ў 9.00, прыйдуць 1282 вучні – гэта на 2 чалавекі больш, чым летась, тады як у 2014м назіралася змяншэнне на 20 школьнікаў у параўнанні з пазамінулым годам. Прыемна, што на два выхаванцы больш стане сёлета і ў вясковых дзіцячых садах – іх будуць наведваць 39 хлопчыкаў і дзяўчынак. А вось колькасць першакласнікаў у раёне застанецца нязменнай – упершыню за парты сядзе 131 чалавек. Праўда, у адрозненне ад мінулага года, у бацькоў з гарпасёлка не будзе выбару – аддаваць дзіця ў школьны першы клас, ці пры садзе: усе чатыры класы самай малодшай паралелі будуць займацца ва Ушацкай СШ. Абумоўлена гэта правядзеннем капітальнага рамонту ясляўсада №4, які плануецца завяршыць восенню. Разам з тым, недахопу месцаў для дашкольнікаў у нас няма, у цяперашні час працягваецца набор у ясельныя групы. Няма і дэфіцыту кадраў: усе навучальныя ўстановы поўнасцю ўкамплектаваны педагогамі.
– Як праходзіла прыёмка школ да новага навучальнага года? Ведаю, што ў гэтым пытанні Вам ёсць чым пахваліцца…
– Сапраўды, пашпарты гатоўнасці ўсіх нашых навучальных устаноў былі падпісаны яшчэ да 1 жніўня – мы падрыхтавалі школы да заняткаў першымі ў вобласці! Гэтая акалічнасць адыграла сваю ролю ў тым, што менавіта на базе Ушацкага раёна начальнік упраўлення адукацыі Віцебскага аблвыканкама І.А.Шчурок правёў сёлета прэсканферэнцыю па тэме падрыхтоўкі да пачатку навучальнага года. Падчас мерапрыемства журналісты рэспубліканскіх і абласных СМІ наведалі Арэхаўскую, Вялікадолецкую і Ушацкую школы і засталіся пад вялікім уражаннем ад убачанага. Іван Антонавіч адзначыў тую вялікую ўвагу, з якой кіраўніцтва раёна і асабіста старшыня Ушацкага райвыканкама В.В.Родзіч ставіцца да пытанняў сферы адукацыі: так, сёлета з раённага бюджэту былі выдзелены сродкі на капітальны рамонт дзіцячага сада №4, па ініцыятыве старшыні райвыканкама тэрыторыю ля Ушацкай школы ўпрыгожыў новы сквер. У сваю чаргу, знакам прызнання гэтай работы стала рашэнне абласнога ўпраўлення ўключыць Ушацкую СШ у лік чатырох школ вобласці, якім выдзелены новы сучасны кабінет хіміі.
Сёлета рамонт нашых устаноў праводзіўся за кошт сродкаў, выдаткаваных з бюджэту, пазабюджэтнай дзейнасці, спонсарскай дапамогі, 50 навучэнцаў працавала на падрыхтоўцы школ ад раённага цэнтра занятасці, як заўсёды ўклад у якасную падрыхтоўку ўнеслі адміністрацыі, настаўнікі, тэхперсанал і бацькі. Усё гэта дапамагло дабіцца адметнага выніку.
– А што новага ў вучэбным працэсе рыхтуе нам гэты навучальны год?
– Асноўны акцэнт – забеспячэнне высокай якасці агульнай сярэдняй адукацыі. Працягнуць вывучаць асобныя дысцыпліны на павышаным узроўні адзінаццацікласнікі. Змяніліся патрабаванні для дзесяцікласнікаў – залічэнне навучэнцаў у профільныя класы праводзіцца на конкурснай аснове па выніках навучання на другой ступені агульнай сярэдняй адукацыі: адзнакі павінны быць не ніжэй 7мі балаў па профільных вучэбных прадметах, а сярэдні бал пасведчання аб агульнай базавай адукацыі – не ніжэй 6ці. У новым навучальным годзе плануецца адкрыць 4 групы і 1 клас з вывучэннем на павышаным узроўні наступных профільных прадметаў: хіміі, фізікі, матэматыкі, біялогіі, беларускай і замежнай мовы. І калі раней былі профілі, то зараз можна будзе выбіраць для вывучэння любыя прадметы – гэтае новаўвядзенне зроблена з улікам пажаданняў бацькоў і вучняў. На базе Ушацкай СШ па суботах працягнуць работу міжшкольныя факультатывы. Па жаданні бацькоў іх дзеці змогуць на платнай аснове займацца з педагогамі індывідуальна па любых прадметах – фактычна гэта будзе “легальнае” рэпетытарства, арганізаванае пры школе. Прычым, скарыстацца гэтай магчымасцю змогуць не толькі вучні старэйшых класаў, але і ўсе жадаючыя. Змены чакаюць і пяцікласнікаў – для іх уводзіцца новы прадмет “Искусство (отечественная и мировая художественная культура)”.
– Ці адбудуцца змены ў арганізацыі працэсу праезду школьнікаў?
– Не. Падвоз 200 школьнікаў будуць ажыццяўляць 8 школьных аўтобусаў. Да слова, плануецца, што гэтай восенню наш аўтапарк папоўніць яшчэ адзін новы аўтобус, выдзеліць які абяцала абласное ўпраўленне. З 1 верасня 2015 па 30 чэрвеня 2016 года праезд для школьнікаў ад месца жыхарства да месца вучобы і ў зваротны бок бясплатны і ў гарадскім аўтобусе – ім трэба будзе прад’яўляць даведку, на маршрутных аўтобусах – праязны білет (ён набываецца за кошт аддзела адукацыі, спорту і турызму).
– Важным момантам з’яўляецца арганізацыя харчавання…
– Безумоўна, гэта не засталася паза нашай увагай. Ва ўсіх харчаблоках праведзены касметычны рамонт, эстэтычна аформлены абедзенныя залы, набыта сучаснае абсталяванне для прыгатавання ежы: шафы для смажання, працірачныя машынкі, агароднінарэзкі, халадзільнікі – на іх закупку патрачана больш 40 мільёнаў рублёў. Усе харчаблокі забяспечаны гарачай вадой. Дарэчы, наладжана гарачае водазабеспячэнне ва ўсіх дзіцячых садах гарпасёлка: закуплена спецыяльнае абсталяванне, якое падключаецца да сістэмы ацяплення, і яго эксплуатацыя абыходзіцца значна танней, чым карыстанне электранагравальнымі прыборамі.
Хачу нагадаць бацькам з мнагадзетных, малазабяспечаных і іншых катэгорый сем’яў, якія маюць права на атрыманне льгот па аплаце харчавання, што адпаведную заяву патрэбна падаць у адміністрацыю школы не пазней 1 верасня.
– Нагадайце, калі ласка, пра патрабаванні да знешняга віду і экіпіроўкі школьнікаў.
– Яны засталіся нязменнымі: адзенне навучэнцаў павінна адпавядаць дзелавому стылю: для хлопчыкаў гэта пінжак, камізэлька, штаны, кашуля, гальштук; для дзяўчат – пінжак, камізэлька, спадніца альбо штаны, блузка, сарафан. Хачу таксама нагадаць тым, хто яшчэ не атрымаў падручнікі: пажадана зрабіць гэта да 1 верасня. І яшчэ адзін нюанс: ва ўстановах агульнай сярэдняй адукацыі ў 20152016 навучальным годзе будуць выкарыстоўвацца вучнёўскія дзённікі 2014, 2015 гадоў выдання, зацверджаныя Міністэрствам адукацыі Рэспублікі Беларусь, якія маюць грыф “Нацыянальны інстытут адукацыі”.
Усіх дзяцей з нецярплівасцю чакаем у нашых прыгожых утульных школах і дзіцячых садках. Грунтоўных вам ведаў і добрых адзнак!
– Вялікі дзякуй за вычарпальныя адказы.
Гутарыла Наталля БАГДАНОВІЧ.
