1 верасня заўсёды ўрываецца ў жыццё шумна, радасна, пад песні пра школу і дзяцінства, пад пералівы першага школьнага званка. Не стаў выключэннем і сёлетні год. Нават не гледзячы ў каляндар, па інтэнсіўным руху прыбраных школьнікаў з букетамі ў руках можна было здагадацца пра пачатак новага навучальнага года. Учора ва ўсіх установах адукацыі раёна прайшло хвалюючае і трапяткое свята – Дзень ведаў.
Урачыстая лінейка ва Ушацкай школе хоць і праходзіла на звыклым месцы, аднак была прасякнута ў многім асаблівым настроем. Сёлета за парты гэтай і без таго самай “прадстаўнічай” у раёне навучальнай установы сядуць 830 вучняў. Не часта ўбачыш у адным месцы і столькі галоўных віноўнікаў дзейства – першакласнікаў: у чатырох класах іх будзе навучацца ажно 88. Крыху няёмка пакуль адчуваюць сябе і вучні зачыненай Плінскай школы. Аднак асвоіцца ім, няма ніякіх сумненняў, будзе проста: побач з імі – іх настаўнікі, а сярод аднакласнікаў – нямала знаёмых.
Словы віншаванняў і найлепшыя пажаданні ў адрас педагогаў, вучняў установы прагучалі ў гэты дзень ад яе дырэктара В.І.Клімашэўскага і старшыні раённага Савета дэпутатаў В.М.Захарэнка. З падарункамі ў выглядзе пазнавальных кніг (а што можа быць лепш напярэдадні святкавання 500-годдзя беларускага пісьменства) прыйшлі на ўрачыстасць прадстаўнікі райаддзела па надзвычайных сітуацыях і разлікова-касавага цэнтра №37 “Белаграпрамбанка” г.п.Ушачы – пазней жа, пасля лінейкі і першага ўрока пад назвай “Беларусь – мая Айчына!”, яны правялі для вучняў першых класаў заняткі па правілах бяспекі, а для пятых – урок фінансавай граматнасці. А лясгас традыцыйна падарыў школе спартыўны інвентар і канцылярскія прыналежнасці.
На першым уроку самыя маленькія школьнікі ўсіх навучальных устаноў Ушаччыны атрымалі кнігу “Беларусь – наша Радзіма. Падарунак Прэзідэнта Рэспублікі Беларусь А.Р.Лукашэнкі першакласніку”. А ў рамках рэспубліканскай акцыі “Белая Русь” – з любоўю да дзяцей” хлопчыкі і дзяўчынкі атрымалі віншавальныя паштоўкі ад старшыні Віцебскага абласнога Савета дэпутатаў, старшыні абласной арганізацыі РГА “Белая Русь” У.У.Цярэнцьева і падарункі ад раённай арганізацыі грамадскага аб’яднання.
Запамінальна праходзіла свята першага званка ў Глыбачанскай школе, за парты якой сёлета сядзе 81 вучань. Старшыня райвыканкама У.Г.Аўдошка шчыра падзякаваў педкалектыву і тэхперсаналу за выдатную падрыхтоўку ўстановы да новага навучальнага года, пажадаў першакласнікам (іх сёлета чацвёра) і надалей ісці па жыцці з агеньчыкам у вачах, выпускнікам (іх 10) – знайсці свой шлях, і ўсім без выключэння – поспехаў. Намеснік начальніка аддзела адукацыі, спорту і турызму райвыканкама Т.У.Шарыпенка выказала спадзяванне, што былыя вучні сярэдняга звяна і старэйшых класаў Вяркудскай школы (сёлета ўстанова пераведзена ў статус дзіцячага сада-пачатковай школы) хутка асвояцца ў сценах новай альма-матэр.
Ва ўсіх навучальных установах Дзень ведаў быў багаты на радасныя ўсмешкі і шчырыя словы ад прадстаўнікоў улады, дэпутацкага корпусу, прадпрыемстваў і арганізацый Ушаччыны, іншых гасцей. Завяршыў жа ўрачыстыя лінейкі імправізаваны першы званок, які абвясціў аб надыходзе цікавых, часам цяжкіх, але такіх неабходных для вучняў будняў.
Кацярына КАВАЛЕЎСКАЯ
