«Подъёмный» вариант для неподъёмных вещей. Ушачанин Артур Свежинский предлагает землякам услуги по чистке ковров и мягкой мебели

Общество

На тое, што прадпрымальнікі павінны больш актыўна развіваць бізнес у малых гарадах і сельскай мясцовасці, Прэзідэнт нашай краіны звяртаў увагу неаднойчы. “Мы абавязаны больш сур’ёзна падумаць пра вяскоўцаў і якасць іх жыцця. Сучасныя людзі маюць патрэбу ў рамонце дамоў і бытавой тэхнікі, у стрыжцы, пашыве адзення і многім іншым. Малы бізнес здольны гэта зрабіць. Але павінны быць адпаведныя ўмовы і даступныя цэны на паслугі ў сельскай мясцовасці”, – адзначаў Аляксандр Лукашэнка.

На стымуляванне прадпрымальніцкай ініцыятывы, стварэнне ўмоў для самазанятасці скіраваны шэраг прынятых у апошні час заканадаўчых актаў. Сярод такіх, напрыклад, Указ Прэзідэнта №345 “Аб развіцці гандлю, грамадскага харчавання і бытавога абслугоўвання”, у якім прадугледжана ўсё магчымае для змяншэння затрат сельскіх прадпрымальнікаў: адсутнасць падатку на зямлю і нерухомасць, на дабаўленую вартасць (а гэта прыкладна пятая частка кошту), утрая ніжэйшы падатак на прыбытак. Асабліва ж прывабным стала аказанне бытавых паслуг вяскоўцам і жыхарам невялікіх пасёлкаў для індывідуальных прадпрымальнікаў, якія з’яўляюцца плацельшчыкамі адзінага падатку, – за ажыццяўленне дзейнасці яны ўносяць у месяц усяго адну базавую велічыню. Менавіта гэтыя льготы падштурхнулі маладога ўшацкага індывідуальнага прадпрымальніка Артура Свяжынскага да рашэння распачаць сваю справу.

Малады чалавек пэўны час жыў і працаваў у Расійскай Федэрацыі, але вырашыў вярнуцца на малую радзіму, па якой заўсёды сумаваў. У прафесійным арсенале Артура дыпломы тэхнікума па спецыяльнасцях юрыста і тэхніка-праграміста, а таксама Смаленскага ўніверсітэта, дзе ён вывучаў эканоміку і кіраванне на прадпрыемствах. Тым не менш, уладкавацца на работу ў нашым раёне па гэтых прафесіях не змог. А калі рэгістраваўся ў якасці беспрацоўнага, атрымаў ад спецыялістаў цэнтра занятасці насельніцтва параду адкрыць уласную справу.

– Прапанова зацікавіла, тым больш што дзяржава ў такіх выпадках вы­дзяляе бязвыплатную субсідыю, – расказвае Артур. – Засталося рашыць, чым менавіта заняцца. Прааналізаваў рынак працы і прыйшоў да высновы, што калі, напрыклад, ушачанін хоча адрамантаваць абутак, адзенне ці бытавую тэхніку, зрабіць дублікат ключоў, то ён можа атрымаць такую паслугу ва Ушачах, а вось калі ў доме забрудзіўся дыван – везці яго трэба аж у Полацк, не кажучы ўжо пра непад’ёмную мяккую мэблю. Вось і рашыў паспрабаваць запоўніць гэтую нішу і заняцца прафесійнай хімчысткай тэкстыльных прадметаў інтэр’ера на доме. Дзвюх з паловай тысяч рублёў субсідыі якраз хапіла на набыццё спецыяльнага абсталявання – прафесійнага мыючага пыласоса з неабходнымі насадкамі: дзякуючы яму з паверхні ўбіраецца распылены раней чысцячы сродак і яна становіцца практычна сухой.

Яшчэ адзін неабходны стартавы элемент – рэклама. Артур распаўсюджваў яе праз інтэрнэт, расклейваў на пад’ездах і, канечне, даваў аб’явы ў “раёнцы”, якая для многіх вясковых жыхароў па-ранейшаму з’яўляецца асноўнай крыніцай інфармацыі. Некалькі трэніровачных чыстак на прадметах уласнага інтэр’еру, а потым і першы заказ ад жыхаркі адной з ушацкіх шматпавярховак. Пераўтварэннем свайго дывана пажылая жанчына засталася задаволенай, як і ветлівасцю маладога прадпрымальніка.

– Дэвіз “кліент заўсёды правы” трэба засвоіць любому, хто спрабуе сябе ў сферы паслуг, – упэўнены А.Свяжынскі. – Пагаварыць з чалавекам, даць парады па доглядзе за мэбляй, а то і паспачуваць наконт хваробы ці выслухаць расказ пра ўнукаў, – гэта таксама складнік якаснага абслугоўвання. А яшчэ, адчыняць дзверы дома абавязкова трэба з усмешкай!

Бываюць у Артура заказы і з сяла – на ўласным аўтамабілі ён можа выехаць у любую вёску. З цеплынёй расказвае, напрыклад, пра сям’ю з Селішча, у доме якой нядаўна чысціў дываны і мяккую мэблю: кліентаў парадавалі вынікі работы і яны нават пачаставалі вельмі смачным салам ад уласнага парсючка!

А ці пад’ёмныя для ўшачан расцэнкі на паслугу? Напэўна, кожны гаспадар сам павінен меркаваць, ці можа ён выдаткаваць, напрыклад, 18 рублёў на тое, каб брудны дыван 2х3 стаў “бы толькі з крамы”, ці аддаць 30 за абнаўленне канапы. Паспрабуе майстар вярнуць першапачатковы выгляд і рэчам, на якіх “пагаспадарылі” каты ці сабакі, але абыдзецца гэта крыху даражэй, бо ўхіліць плямы і спецыфічны пах бывае няпроста.

Калі справы і надалей будуць ісці няблага, прадпрымальнік мяркуе з надыходам цёплага сезона заняцца і чысткай салонаў аўтамабіляў. Не выключае таксама, што зробіць аказанне бытавых паслуг не асноўным, а дадатковым сваім заняткам.

Наталля БАГДАНОВІЧ.

Бытавыя паслугі ў Беларусі зараз аказваюць звыш 37,3 тысячы суб’ектаў гаспадарання, 33 працэнты з іх – юрыдычныя асобы, а астатнія дзве трэці – індывідуальныя прадпрымальнікі. Найбольш запатрабаваныя са 157 відаў паслуг – цырульныя (18,7 працэнта ад агульнай колькасці). На сяле паслугі аказваюць 13,3 працэнта суб’ектаў. Летась у беларускіх райцэнтрах і вёсках было адкрыта 1128 новых аб’ектаў бытавога абслугоўвання.



1 комментарий по теме “«Подъёмный» вариант для неподъёмных вещей. Ушачанин Артур Свежинский предлагает землякам услуги по чистке ковров и мягкой мебели

  1. Для работы ,клеить обои ,готовить стены ,шпаклевать их .Нужно открывать ИП .Выделяются ли средства на это,для закупки материала ..???7

Добавить комментарий

Ваш e-mail не будет опубликован. Обязательные поля помечены *