Выбар імя для дзіця – справа адказная. Часцей да нас, у аддзел загса, прыходзяць бацькі, якія выбралі імя загадзя. Аднак бывае і такое, што даводзіцца дапамагаць, знаёміць бацькоў са статыстыкай.
З першага студзеня па трыццатага верасня ва Ушацкім раёне зарэгістравана нараджэнне 43 дзяўчынак і 48 хлопчыкаў. Самымі папулярнымі дзявочымі імёнамі ў гэтым годзе з’яўляюцца Ульяна (пяць дзяўчынак атрымалі гэтае імя), Дар’я і Аляксандра (па тры выпадкі рэгістрацыі). Цікавы той факт, што на працягу апошніх двух гадоў лідэрства па папулярнасці бясспрэчна належала імені Анастасія, у 2009 годзе зарэгістравана восем такіх імён. На пачатак кастрычніка ў раёне адзначаны толькі адзін выпадак рэгістрацыі нованароджанай Насці. Густы бацькоў мяняюцца.
Змянілася ў параўнанні з мінулым годам і папулярнасць мужчынскіх імёнаў. Калі ў 2009 годзе распаўсюджанымі былі Мікіта (названа 8 хлопчыкаў), Дзмітрый, Мацвей (па 5), Ілья, Глеб і Арцём (па 4), то ў 2010 годзе – папулярнымі сталі Іван, Ягор, Раман, Уладзіслаў, Аляксандр і Максім (па тры).
Народныя павер’і сцвярджаюць, што ад імя чалавека залежыць яго лёс. Верыць у гэта ці не – выбар кожнага. Мы, работнікі аддзела загса, радуемся рэгістрацыі кожнага нованароджанага, бо сам факт, што сем’і папаўняюцца, дае надзею на светлую будучыню краіны.
А.МАЛАШЧАНКА,
