Вельмі прыемная навіна прыйшла на гэтым тыдні ў дом Таццяны і Аляксандра Юркевічаў з гарпасёлка: Таццяна Пятроўна ўдастоена высокай узнагароды – ордэна Маці. Знакавай падзею можна лічыць і для раёна – нячаста ўшачанкі атрымліваюць такую дзяржаўную ўзнагароду.
“Гэта ж так складана! Столькі сіл і цярпення трэба!” – заўсёды прыкмячаюць знаёмыя сям’і. Таццяна ж зазначае, што мацярынскія абавязкі прыносяць ёй толькі радасць. У свае 34 гады яна ўжо маці шасцярых цудоўных дзетак! У той час як многія яе аднагодкі толькі рашаюцца на другое дзіця, або наогул аддаюць перавагу кар’еры. Да дэкрэтнага водпуску жанчына працавала бухгалтарам у “Агра-Селішча”, а галава сям’і Аляксандр Юр’евіч зараз заняты ў філіяле “Маяк-Ушацкі”.
Іх старэйшаму сыну Мікіту ўжо 13 гадоў і сёлета ён пойдзе ў сёмы клас Ушацкай школы. Хлопчык наведвае і школу мастацтваў, дзе асвойваю ігру на гітары. Творчымі растуць і астатнія дзеці. 11-гадовай Мар’яне падабаецца плесці з саломы, а таму займаецца ў адпаведным гуртку, таксама дзяўчына грае на фартэпіяна. А вось другакласніца Насця вельмі любіць танцаваць. “А паглядзіце, які прыгожы абруч мне мама зрабіла сваімі рукамі! Ён пасуе да маёй сукенкі. А яшчэ мама нам прычоскі спрытныя робіць!” – ахвотна расказвае дзяўчынка. Выхоўваюцца ў сям’і яшчэ і трое малодшых хлопчыкаў – чатырохгадовы Яраслаў, двухгадовы Лёша і Дзіма, якому паўтара.
Незлічоная колькасць разоў у іх кватэры ў новым доме на Віцебскай за дзень гучыць слова “мама”, і яна ўвесь час завіхаецца каля сваіх дзяцей. Да таго як пабудаваць з дзяржпадтрымкай жыллё ва Ушачах, сям’я жыла з бацькамі ў Селішчы і, канечне, вельмі радаваліся, калі з’явіліся ўласныя метры.
Старэйшыя дзеці з задавальненнем дапамагаюць маме спраўляцца з хатняй работай і прыглядаць за маленькімі. Надзейнай падтрымкай і апорай ва ўсіх справах з’яўляецца тата.
Мікіта, Насця і Мар’яна прыйшлі разам з любімай мамай на ўрачыстае ўзнагароджанне, якое прайшло ў чацвер у райвыканкаме. “Хвалюючы момант, таму падтрымка родных вельмі дарэчы. Гэта для мяне надзвычай пачэсна!” – прызналася Таццяна.
◆ Ордэн Маці быў зацверджаны Указам Прэзідэнта Рэспублікі Беларусь у 1995 годзе і стаў пераемнікам савецкай традыцыі заахвочвання мнагадзетных маці на дзяржаўным узроўні. Усяго гэтай узнагароды ў нашай краіне ўдастоена больш 9600 мам, на Ушаччыне яе маюць 28 жанчын.
– Мнагадзетная мама заўсёды выклікае павагу і захапленне, бо асноўны цяжар па нараджэнні і выхаванні дзетак, бясспрэчна, кладзецца на яе плечы. Здароўя, дабрабыту, шчасця вашай сям’і! – адзначалі падчас уручэння ордэна і пасведчання старшыня райвыканкама Уладзімір Генадзьевіч Аўдошка і яго намеснік Алена Васільеўна Пашковіч. Пасведчанне і Указ Прэзідэнта “Аб узнагароджанні за нараджэнне і выхаванне пяцярых і больш дзяцей” сям’я будзе беражліва захоўваць у сямейным архіве.
Таксама Таццяне Пятроўне быў перададзены падарунак ад Віцебскага абласнога аддзялення рэспубліканскага грамадскага аб’яднання “Беларускі дзіцячы фонд”.
Вольга КАМАРКОВА.