Апошнімі тыднямі актывізавалася спартыўнае жыццё і нашы землякі адзначыліся цэлым шэрагам дастойных выступленняў на спаборніцтвах рознага кшталту ў Мінску, Віцебску і іншых гарадах Беларусі.
Стойка бароліся ў “Стайках”
Пачнём жа мы падборку з турніру самага высокага рангу: Кубка Беларусі па самба, які нядаўна праходзіў у Рэспубліканскім цэнтры алімпійскай падрыхтоўкі “Стайкі”. Як вядома, гэтым летам выканкам Міжнароднага алімпійскага камітэта рэкамендаваў уключыць гэты від адзінаборстваў у алімпійскую праграму, таму ўвага да яго развіцця зараз асаблівая. І вельмі прыемна, што ў лік прызёраў на прэстыжным турніры трапілі дзве былыя выхаванкі Ушацкай ДЮСШ. Срэбраны медаль у вагавой катэгорыі да 65 кг заваявала Крысціна Зуева, а Сняжана Чарапанава (на здымку) узнялася на трэцюю прыступку п’едэстала ў вазе звыш 80 кг.
Пяць залатых медалёў
прывезлі з абласнога цэнтра юныя ўшацкія дзюдаісты. Яны дэманстравалі сваё майстэрства на адкрытым першынстве горада сярод юнакоў і дзяўчат 2008-2011 гадоў нараджэння. У старэйшай групе не мелі сабе роўных Павел Шакута і Паліна Пацэвіч. “Бронзу” паклалі ў сваю скарбонку Яўген Карэйша, Сяргей Жарнасек і Каміла Первянёнак. Парадавалі і больш юныя выхаванцы нашай ДЮСШ: не пакінулі шансаў саперніцам Уладзіслава Цюкала, Аляксандра Міхаль і Кацярына Рубанік, “срэбра” на рахунку Карыны Лецкай і Яўгеніі Крывёнак, трэцімі ў сваіх вагавых катэгорыях сталі Раман Ардынскі і Уладзіслаў Сматроў. Хочацца павіншаваць і трэнераў Святлану Фядосенка, Кацярыну Маркевіч, Канстанціна Дука, якія здолелі якасна падрыхтаваць сваіх падапечных да гэтых стартаў.
Злавілі хвалю поспеху
выхаванцы аддзялення плавання нашай спартшколы. У гэты раз сваю хуткасць яны дэманстравалі не ў дамашнім басейне, а на сталічных водных дарожках, дзе праходзіў Адкрыты турнір на прызы чэмпіёна свету і Еўропы Аляксандра Гукава. У час сваёй кар’еры праслаўлены беларускі плывец спецыялізаваўся ў брасе, і ў гэтым жа стылі плавання спаборнічала на дыстанцыі 50 метраў юная ўшачанка Анастасія Касіч (на здымку). Паказаны вынік дазволіў дзяўчыне ўзняцца на трэцюю прыступку п’едэстала. Ну а яшчэ адзін наш прадстаўнік – Аляксей Салодкін зноў пацвердзіў свой клас у плаванні на спіне і ўзяў “бронзу” на стометроўцы.
Дастойны дэбют
Хоць да Ранальду ды Месі выхаванцам трэнера фізкультурна-спартыўнага клуба Рамана Фядосенкі пакуль яшчэ далекавата, ды і гульнявыя сувязі ў зусім маладой футбольнай каманды хлопчыкаў 2011-2012 гадоў нараджэння толькі пачынаюць наладжвацца, ужо можна казаць аб некаторых дасягненнях. Так, нядаўна наша дружына адправілася ў Глыбокае на Адкрыты міжраённы турнір па міні-футболе, прысвечаны Году народнага адзінства. У першым паядынку ўшачане ва ўпартай барацьбе саступілі першай камандзе гаспадароў, а вось у наступным з лікам 4-0 разграмілі аднагодкаў з Верхнядзвінска. Супрацьстаяць моцнай міёрскай камандзе не ўдалося, затое другую глыбоцкую дружыну нашы землякі перамаглі – і ў выніку заваявалі “бронзу” спаборніцтваў. Асабліва хочацца адзначыць лідара ўшачан Мацвея Кандрацкага, які забіў шэсць галоў і быў прызнаны лепшым іграком не толькі каманды, а і турніру. Двума галявымі ўдарамі адзначыўся Ілья Сляцкі, па адным запісалі на свой рахунак Міхаіл Кудраўцаў і Марат Цішкоў. Улічваючы, што для большасці хлопчыкаў гэта быў першы выязны турнір, “баявое хрышчэнне” можна прызнаць паспяховым. Ну і, канечне, іх новыя перамогі не за гарамі!
Наталля БАГДАНОВІЧ.
