Па матэрыялах РАУС, за мінулы тыдзень у аддзяленне міліцыі Ушацкага раёна паступіла 36 тэлефанаванняў. Узбуджана тры крымінальныя справы. Да адміністрацыйнай адказнасці прыцягнута 25 чалавек, 10 – за дробнае хуліганства, 9 – за распіццё спіртных напіткаў у грамадскіх месцах (4 з 9 – непаўналетнія). Складзена тры пратаколы за дробны крадзеж.
Па лініі дзейнасці ДАІ складзена 39 пратаколаў.
ВАРТАЎНІК-УГОНШЧЫК
Жыхар г.п.Ушачы, які працаваў вартаўніком на адной з дарожных арганізацый, у адзін з вечароў па ўласнай ініцыятыве “перакваліфікаваўся”… ва ўгоншчыка. Будучы нецвярозым, з ахоўваемай ім тэрыторыі ўчыніў угон службовай машыны і пракаціўся на ёй па гарпасёлку. Машыну без тэхнічных пашкоджанняў вярнулі на месца, а на аўтамабіліста-аматара завялі крымінальную справу.
НЯЎДАЛАЕ ПАЛЯВАННЕ
Жыхар вёскі Чарапоўшчына падчас незаконнага палявання каля падкормачнай пляцоўкі ў лясным масіве побач з вёскай Пушча быў затрыманы работнікамі ДЛГУ “Ушацкі лясгас”. На пытанні работнікаў лесу грамадзянін вырашыў адказаць… нацэленай на іх паляўнічай зброяй. За пагрозу прымянення насілля мужчыне пагражае да 8 гадоў пазбаўлення волі.
ВЕРНЫ ТРАДЫЦЫЯМ
Жыхар вёскі Ціханяты ў гэтым годзе ўжо прыцягваўся да адміністрацыйнай адказнасці за кіраванне транспартным сродкам у стане алкагольнага ап’янення. Але не зрабіў для сябе ніякіх вывадаў. Невядома, колькі б працягваліся “нецвярозыя” паездкі мужчыны на скутэры, калі б ён не быў затрыманы супрацоўнікамі ДАІ. Заведзена крымінальная справа.
Падрыхтавала К.КАВАЛЕЎСКАЯ