Ужо ў пятнаццаты раз на Віцебшчыне прайшоў конкурс “Энергамарафон-2021”. І прыемна адзначыць, што работа “Сем ідэй сям’і Церашкавец на шляху да эканоміі энергарэсурсаў” прызнана лепшай у намінацыі “Энергазберагальная сям’я”.
І неўпершыню. У 2020 годзе мы ўжо пісалі на старонках “Патрыёта” пра візіт у аграгарадок Глыбачка да гэтай сям’і. Тады гаспадары расказвалі пра сваю перамогу ў праекце “Сонечны дом”. Паказвалі, як памянялі ўсе лямпы на энергазберагальныя, паставілі насадкі на краны, уцяплілі вокны і сцены, замест ванны зрабілі маленькую лазню, якая хутка награваецца. На той час ужо апробавалі розныя варыянты катлоў, здольных “самастойна” ацяпляць дом на працягу чатырох сутак. І пайшлі далей, зрабіўшы новы з эканамайзерам, з дапамогай якога вада перад падачай у кацёл награваецца выходзячымі з яго газамі. Наогул мадэрнізацыя, зробленая Ігарам Віктаравічам, заслугоўвае асаблівай увагі, і ўмелец дзеліцца задумай з жадаючымі. Не ўдаючыся ў падрабязнасці, раскажам пра вынік: расход паліва скараціўся на 20-25 працэнтаў. А паколькі за ацяпляльны сезон расходавалася 20 кубаметраў дроў, а пасля мадэрнізацыі патрэбна 15, то за зіму захавана палянка лесу. Толькі адной сям’ёй!
А ў пазалеташні год Церашкаўцы выратавалі яшчэ дзве, паколькі ставілі чарговы эксперымент. Чатыры месяцы сям’я абагравалася брыкетам з пілавання ўласнага прыгатавання, паколькі знаходзяцца па суседстве з піларамай, якая не выкарыстоўвала адходы драўніны. І менавіта гэты варыянт, безумоўна, самы танны, калі, канечне, ёсць у дастатковай колькасці бясплатнае пілаванне.
◆ Парада ад Церашкаўцоў: самая аптымальная тэмпература халадзільніка – 3-5 градусаў.
Асобна хочацца адзначыць, што, эканомячы, сям’я не ўшчамляе сваіх жаданняў і патрэб. Гэта падкрэсліла ў сваёй прэзентацыі дачка Ксюша (на здымку). “Наадварот, мы сумяшчаем прыемнае з карысным, настроены на актыўнае атрыманне новых ведаў і практычных уменняў, на ажыццяўленне сваіх ідэй у жыццё. Мы плануем сваю будучыню, у якой ёсць месца эканоміі і зберажэнню, і хацелі б, каб іншыя таксама змаглі гэтаму навучыцца”.
Канкрэтныя парады па зберажэнні рэсурсаў, безумоўна, цікавяць усіх. Тым больш што ёсць метады, якія нам нічога не каштуюць, напрыклад, праціранне лямпачак ад пылу ці падаграванне ежы на газе, а не ў мікрахвалеўцы. Таму чакаем вашых слушных парад наконт эканоміі.
Вольга КАРАЛЕНКА.
