Што такое падарожжа? Кажуць, што гэта самы лепшы спосаб спазнаць свет і людзей ў ім. Паходы, новыя адкрыцці — усё гэта ўзбагачае ўнутраны свет чалавека, прыносіць у жыццё новыя эмоцыі. А калі ў пазнавальную вандроўку на веласіпедах накіроўваешся разам з сябрамі і вопытнымі турыстамі, здаецца, бярэш пазітыву ад жыцця па максімуме.
Нядаўна выхавальнікі гуртка «Турыст» Ушацкага раённага цэнтра дзяцей і моладзі прынялі ўдзел у велапаходзе першай ступені цяжкасці. Вядома, поспех вандроўкі залежыў не толькі ад добра распрацаванага маршруту, але і ад галоўнага чалавека на ім — інструктара па турызме Валерыя Уладзіміравіча Кораня. Вялікі ўклад у развіццё секцыі паходаў унёс і педагог-арганізатар цэнтра дзяцей і моладзі Іван Станіслававіч Відзевіч.
Само падарожжа складалася з некалькіх частак: Ушацкі, Глыбоцкі, Докшыцкі раёны — амаль тыдзень штодзённых прыгод. Яго ўдзельнікі ўбачылі рэчку Шоша на Глыбоччыне, дзе базіраваліся партызанскія брыгады, Курган Славы, помнік воінам і партызанам у Падсвіллі, пабывалі ў панскім маёнтку ў Чарапоўшчыне, а таксама на месцы былой пагранічнай заставы ў лесе, дзе нядаўна з’явілася мемарыяльная дошка.
Шлях ускладняўся няпростымі ўмовамі надвор’я, неабходнасцю пераадольваюць участкі з крутымі пад’ёмамі і спускамі. Падчас дажджу турысты былі вымушаны ісці па маршруце пешшу, узяўшы веласіпед у рукі. Любыя паломкі — рамонт калёс, хадавой часткі свайго двухколавага сябра — ліквідавалі самастойна. Рыхтаваць ежу на кастры школьнікі навучыліся вельмі хутка. Значна дапамаглі турыстам людзі, якія сустракаліся на іх шляху, давалі месца для начлегу.
У канцы падарожжа каманда веласіпедыстаў зрабіла фота ля помніка воінам-інтэрнацыяналістам ва Ушачах, якое засведчыла традыцыйны рытуальны момант — складанне рук усіх удзельнкаў паходу для таго, каб у хуткім часе сустрэцца зноў.
А.ФУТАРМАН, метадыст Ушацкага раённага цэнтра дзяцей і моладзі.
