З канца студзеня па сённяшні дзень у Беларусі праведзена звыш 19 тысяч лабараторных даследаванняў па выяўленні каранавіруса. Выкарыстоўваюцца айчынныя тэставыя сістэмы, якія дазваляюць атрымаць вынік ад чатырох гадзін да сутак. Паскорыць гэты працэс дапамогуць экспрэс-тэсты – кітайскі бок перадаў днямі 10008 панэляў.
Між тым, бегчы ў бальніцу, каб дзеля цікаўнасці даведацца, ці “жыве” ў арганізме Сovid-19, не трэба! Улічваючы дастаткова спакойную сітуацыю ў рэгіёнах, у тым ліку на Ушаччыне, тэсціраванне тут не робіцца. Толькі ў экстранных сітуацыях (пасля кантакту з хворым ці з’яўлення сімптомаў захворвання пасля нядаўняга вяртання з краіны, дзе вірус атрымаў шырокае распаўсюджанне) у вас возьмуць біялагічны матэрыял і адправяць на праверку ў Мінск. У выпадку, калі эпідэміялагічная сітуацыя ў краіне ўскладніцца, адмысловыя лабараторыі з’явяцца і ў іншых буйных гарадах.
Не варта “весціся” на прапановы інтэрнэт-магазінаў, якія за немалыя грошы рэалізуюць даверлівым асобам нібыта тэсты на вызначэнне каранавіруса на доме (накшталт глюкометраў, тэстаў на цяжарнасць), – як адзначаюць эксперты, такіх на сённяшні дзень не існуе! Лепш падстрахуйце сябе ад заражэння каранавірусам – часцей мыйце рукі з мылам, апрацоўвайце іх антысептыкам, насіце маскі. Дарэчы, праблем з набыццём апошніх ва Ушачах няма – у аптэках ёсць як санітарна-гігіенічныя шматразовыя, так і медыцынскія аднаразовыя.
Кацярына КАВАЛЕЎСКАЯ.
