На мінулым тыдні пажарныя машыны імчалі ў бок цэнтральнай кацельні, а ўшачане тым часам занепакоена пачыналі абмяркоўваць: “Няўжо нешта здарылася? Мабыць, застанёмся без цяпла ў кватэрах…” І сапраўды, на цэнтральнай кацельні ўзнік пажар, але, на шчасце, ён быў умоўным, бо тут праходзілі тактыка-спецыяльныя вучэнні.
Як вядома, пажар лягчэй папярэдзіць. Калі ж надзвычайная сітуацыя ўзнікла, то трэба аператыўна яе ліквідаваць, а зладажана працаваць у такім выпадку павінны не толькі выратавальнікі, а і ўсе астатнія службы. Цэнтральная кацельня УП ЖКГ – аб’ект стратэгічны і адносіцца да высокай катэгорыі пажаранебяспечнасці. На пачатку новага ацяпляльнага сезона і вырашана было яшчэ раз адпрацаваць алгарытм неабходных дзеянняў у выпадку здарэння. Так, у выніку неасцярожнага абыходжання з агнём рабочага персаналу цэнтральнай кацельні адбылося ўзгаранне на складзе шчапы, узнікла пагроза распаўсюджвання агню на дах і суседнія памяшканні кацельні.
Па сігнале імгненна да месца прыбылі тры пажарныя разлікі з Ушач і Двор Пліна. Атрымаўшы неабходную інфармацыю на разгорнутым штабе, выратавальнікі кінуліся на барацьбу з агнём. Адны тушылі пажар на складзе, другія не давалі распаўсюдзіцца полымю на дах. Стала вядома, што ўнутры аднаго з задымленых памяшканняў застаўся рабочы. Узброіўшыся спецыяльным абмундзіраваннем, пажарныя накіраваліся ў памяшканне і ў хуткім часе вынеслі адтуль пацярпелага, які быў перададзены своечасова падаспеўшай брыгадзе “хуткай дапамогі”. Работнік кацельні з прыкметамі атручвання прадуктамі гарэння быў дастаўлены ў бальніцу. На месцы здарэння тым часам працавалі таксама супрацоўнікі РАУС, райгаза, электрычных сетак, вузла электрасувязі. УП ЖКГ перавяла ў павышаную гатоўнасць аварыйныя і рамонтныя службы і гатова было запусціць рэзервовае кацельнае абсталяванне.
З узгараннем удалося аператыўна справіцца.
Падчас вучэнняў праверку на гатоўнасць да пажару прайшлі і непасрэдна работнікі ЖКГ – яны прадэманстравалі, як будуць спраўляцца з узгараннем пры дапамозе пярвічных сродкаў пажаратушэння – пяску і вогнетушыцеляў.
Падводзячы вынікі тактыкаспецыяльных вучэнняў, намеснік старшыні райвыканкама, старшыня камісіі па надзвычайных сітуацыях А.В.Галяковіч адзначыў, што падобныя мерапрыемствы – гэта экзамен на гатоўнасць для ўсіх службаў і сказаць, што ў вучэбнай сітуацыі абсалютна ўсе спрацавалі ідэальна – нельга. Напрыклад, персанал кацельні недастаткова вывучыў свае абавязкі, а менавіта яны як ніхто добра ведаюць свой аб’ект і павінны быць не назіральнікамі, а сустракаць увесь транспарт, паказваць і падказваць ачаг узгарання, тым больш што плошча кацельні складае больш за 3500 квадратных метраў.
Кожны з прысутных улічыў памылкі і ў выпадку сапраўднага, а не ўмоўнага ўзгарання ўжо будзе ведаць дакладна, як дзейнічаць. Але лепш, каб надзвычайных сітуацый на гэтым аб’екце ніколі не ўзнікала.
Вольга КАМАРКОВА.
