У Беларусі сітуацыя з наркаманіяй і незаконным абаротам наркотыкаў працягвае заставацца напружанай. Тым не менш, дзякуючы цеснаму ўзаемадзеянню органаў аховы здароўя, унутраных спраў, а таксама грамадзянскай супольнасці яна пакуль кантралюецца. На 1 студзеня 2016 года пад наглядам урачоў псіхіятраўнарколагаў знаходзілася каля 14,5 тысячы нарказалежных беларусаў, што на 5,7 працэнта менш, чым у 2014-м.
Насцярожвае тое, што сучасныя наркатычныя сродкі здольны сфарміраваць залежнасць нават пасля некалькіх прыёмаў. Наступствы гэтага захворвання вельмі небяспечныя, бо адбываюцца сур’ёзныя парушэнні функцый унутраных органаў, нервовай сістэмы і дэградацыя асобы. Наркаманы ў павышанай меры схільныя да заражэння на ВІЧ-інфекцыю, вірусны гепатыт, венерычныя захворванні і інш. На жаль, у нашай краіне штогод рэгіструюцца смяротныя выпадкі ад перадазіроўкі наркатычнымі сродкамі: у 2013 годзе іх было 83, у 2014-м – 53, 2015-м – 33. Трэба сказаць, што наркаманія прыводзіць не толькі да фізічнай, маральнай і сацыяльнай дэградацыі асобы, але і часта штурхае нарказалежных да здзяйснення злачынстваў.
Наркаманію варта разглядаць як бедства, супраць якога грамадства павінна ўзвесці надзейны бар’ер. Не цягніце час – толькі зварот да спецыялістаў вырашыць праблему. Прафесійную дапамогу на ананімнай аснове можна атрымаць ва Ушацкай ЦРБ, тэлефон 20344.
В.НАЎЦЭНЯ, псіхіятр-нарколаг Ушацкай ЦРБ.
