Грамадскае аб’яднанне “Белая Русь” традыцыйна выступае за прапаганду сямейных каштоўнасцей, падтрымку мнагадзетных сямей. Менавіта таму 15 мая для яго актывістаў – дата асаблівая. Вось і сёлета абысці ўвагай такое цудоўнае свята – Міжнародны дзень сям’і – Ушацкая раённая арганізацыя, канечне ж, не магла! На бягучым тыдні яе старшыня Іна Фёдараўна Сыроўчанка разам з прадстаўнікамі райаддзела ўнутраных спраў і ТЦСАН Ушацкага раёна завіталі ў госці да дружнай сям’і Аляксея і Марыны Антуновічаў, якія выхоўваюць траіх дзетак.
Мнагадзетнай іх сям’я стала два гады таму, са з’яўленнем на свет маленькага Арсенія, які адразу ж трапіў у цэнтр увагі. Зрэшты, не абдзелены ёй і сярэдні Кірыл, і старэйшая дачушка Ілона, ужо сапраўдная памочніца для матулі, асабліва ў тыя дні, калі тата адпраўляецца на дзяжурства.
– Аляксей Мікалаевіч займае пасаду ўчастковага інспектара міліцыі і, трэба сказаць, удала спраўляецца з пастаўленымі абавязкамі, – характарызуе падначаленага выконваючы абавязкі начальніка РАУС Аляксей Уладзіміравіч Андросаў. – Прыемна, што пры ўсёй занятасці на службе яму ўдаецца быць выдатным сем’янінам, іншы раз за лік сну і адпачынку знаходзіць час, каб дапамагчы жонцы, пагуляць з малышамі.
І.Ф.Сыроўчанка ўручыла Антуновічам падарунак ад “Белай Русі”, пажадала ім шчасця, здароўя, поспехаў у працы і вучобе, ладу і дабрабыту ў доме, нагадаўшы пра адзін з прыярытэтных праектаў грамадскага аб’яднання – “Моцная сям’я – моцная дзяржава!” Ну а ў тым, што гэтая ячэйка грамадства менавіта такая, няма ніякіх сумненняў. Падчас нашай сустрэчы 10гадовая Ілона дапамагала матулі частаваць гасцей смачнай выпечкай. Практычна не адыходзіў ад бацькі 6гадовы Кірыл. А маленькі Арсеній з цікаўнасцю разглядваў гасцей, ласкава ўсміхаючыся Алесі Уладзіміраўне Хвашчэўскай – не толькі кіраўніку ўстановы, у якой працуе самы блізкі яму чалавек, але і сваёй хроснай матулі.
Кацярына КАВАЛЕЎСКАЯ.