Аэробіка, фітнес, ёга – гэты спартыўны арсенал для актыўных ушачанак, якія вядуць здаровы лад жыцця і жадаюць заўсёды быць у зайздроснай форме, з нядаўняга часу папоўніўся пілатэсам і зумбай. Магчымасць наведваць цікавыя і надзвычай карысныя заняткі ў прадстаўніц прыгожай паловы з’явілася з адкрыццём фізкультурна-аздараўленчага комплексу “Юнацтва-Ушачы”.
– Распрацоўваючы праграму, аб’яўляючы набор жадаючых, шчыра кажучы, не чакалі такой актыўнасці з боку ўшачанак, – расказвае кіраўнік названых секцый Юлія Казак, харэограф па спецыяльнасці. – Першапачаткова планавалі адкрыць па адной групе пілатэсу і зумбы. Аднак жадаючых аказалася настолькі многа, што давялося павялічваць гэтую колькасць удвая.
Вось ужо на працягу амаль месяца ўшачанкі два разы на тыдзень наведваюць заняткі: адны – па аўторках і чацвяргах, іншыя – па серадах і пятніцах, як каму зручней. А палове сёмай вечара іх чакае пілатэс. Яго практыкаванні скіраваны на ўмацаванне мышцаў цела і выконваюцца павольна, плаўна. Пры гэтым вялікая ўвага надаецца правільнаму дыханню. Пры рэгулярных занятках пілатэсам цела становіцца больш гнуткім, падцягнутым. Цікава, што практыкаванні для яго былі прыдуманы больш за 100 гадоў назад немцам Джосэфам Пілатэсам, які лічыў, што “здароўе – першы складнік шчасця”.
А вось энергічная зумба, заняткі якой у фізкультурна-аздараўленчым комплексе пачынаюцца ў 19.30, – зусім малады напрамак фітнесу. Яго ў 90-х выпадкова прыдумаў калумбійскі танцор і харэограф Альберта Перэс. Зумба так спадабалася ўсім, што літаральна за некалькі гадоў стала папулярнай больш чым у 185 краінах свету. Зацікавіліся праграмай з элементамі сальсы, самбы, фламенка і на Ушаччыне. Гэта вясёлая, актыўная трэніроўка. Яна дапамагае прапрацаваць максімальную колькасць мышцаў. За гадзіну танцаў страчваецца каля 400-500 ккал.
Адна за адной на чарговую трэніроўку прыходзяць дзяўчаты, маладыя мамы, жанчыны. Цікаўлюся, чым прывабліваюць іх новыя фітнес-заняткі:
– Кожны раз пасля пілатэсу адчуваю моцны прыліў сіл, – кажа Святлана Бугай. – Радуюць паступовае павелічэнне нагрузак і практыкаванні, карысныя для жаночага здароўя. Насамрэч, вельмі добра, што ў нас ёсць магчымасць займацца сабой, сваёй фігурай. А рабіць гэта ў прасторных, светлых залах новага комплексу прыемней удвая.
– Зумба дазваляе развіваць каардынацыю, рухавасць, – далучаецца да размовы Анастасія Станкевіч. – Тут мы адпачываем душой, забываючыся пра асабістыя праблемы. Завадная музыка, прыемная кампанія – што яшчэ патрэбна для танцаў і добрага настрою?
Кацярына КАВАЛЕЎСКАЯ.