Адразу на комплекс былі пастаўлены цялушкі, праз некалькі месяцаў пачаліся ацёлы і пайшла прадукцыя, такая патрэбная гаспадарцы. Першыя месяцы, безумоўна, сталі перыядам адаптацыі і абжывання для жывёлы, а таму асабліва высокіх надояў не было. Зараз на ферме ўтрымліваецца 268 галоў, палова з іх яшчэ не цялілася, а таму канкрэтную прадукцыю – малако — атрымліваюць пакуль не ад усіх кароў.
Сучасная даільная зала, новае халадзільнае абсталяванне – усё накіравана на тое, каб атрымліваць больш тысячы літраў малака ад каровы. Аднак пакуль што надоі трымаюцца такімі ж, як і на іншых фермах “Райаграсервіса”. Электроніка дазваляе не толькі ўбачыць надой ад кожнай каровы, але і прасачыць хваробу жывёлы.
Пасля засялення на комплекс жывёлы выявілася шмат хібаў у будоўлі, тым больш што завяршаючая яе стадыя прыпала якраз на маразы. Цяпер многія з іх выпраўлены і ў дадзены момант улічваюцца пры будаўніцтве другой чаргі комплексу.
– Новае халадзільнае абсталяванне дазваляе захоўваць малако і здаваць яго больш высокім гатункам. Жывёла пастаянна накормлена – тут дзейнічае так званы “шведскі стол”, сёння ў рацыёне свежая кукурузная маса, камбікорм. Па праходах кароўніка спакойна праходзіць кормараздатчык, – абмалёўвае агульную карціну загадчыца завячэльскага комплексу Наталля Васільеўна Мітрохіна (на здымку).
Адзінае, што было падрыхтавана загадзя і тое, з чым не ўзнікае праблем – гэта штат работнікаў. Акрамя даярак і загадчыцы, тут ёсць лабарант, ветэрынарны ўрач. Усе яны ўжо прывыклі да сваіх падапечных і стараюцца трымаць на ўзроўні марку новага і самага сучаснага малочнатаварнага комплексу раёна.
Даведзена да ладу і функцыяніруе службовае памяшканне для персаналу. Канечне, не параўнаць яго з тымі, якія маюцца на іншых фермах раёна, тут створаны ўсе ўмовы для адпачынку.
Побач з фермай нарыхтавана салома, закладваюцца сіласам новыя траншэі, а гэта азначае, што не прыйдзецца перавозіць кармы на вялікую адлегласць.
Як толькі закончыцца будаўніцтва другога кароўніка, пагалоўе павялічыцца ўдвая, і толькі тады можна будзе гаварыць, што малочнатаварны комплекс у Завячэллі дзейнічае на поўную магутнасць і прыносіць аддачу.
