Рейд по злостным нарушителям правил пожарной безопасности

Непрыглядны дом, не абгароджаная вакол яго тэрыторыя. У доме, мякка кажучы, беспарадак, усё завалена рэчамі, якія яўна ляжаць не на сваіх месцах. Печы са шчылінамі, а праводка не ў самым лепшым стане…
–У ложку я не куру, а вось тут, за сталом, парадак сёння навядзём, ды і печ у нас нармальная, колькі часу ўжо так жывём – і нічога не здарылася!
Убачыць і пачуць такое давялося падчас нядаўняга рэйду па населеных пунктах Кубліцкага сельсавета разам з яго старшынёй І.В.Ластаўкай і старшым інспектарам дзяржпажнагляду С.Я.Аваднёвым па праверцы пажарнага стану ў дамах нядобранадзейных грамадзян.

Кубліцкі сельсавет заваяваў непрыемнае лідарства па колькасці пажараў і гібелі людзей. За 2 месяцы ў раёне адбылося 11 пажараў, з іх у Кубліцкім сельсавеце – 2. У Белюкоўшчыне і Баяршчыне загінула 2 чалавекі. Аднак сумная статыстыка і страшныя факты гібелі не ўздзейнічаюць на парушальнікаў правіл пажарнай бяспекі.
Самай распаўсюджанай прычынай узнікнення пажараў як у вобласці, так і ў нашым раёне з’яўляецца курэнне ў нецвярозым стане. З 241 загінуўшага ў вобласці за мінулы год 217 чалавек знаходзілася ў нецвярозым стане. І большасць з гэтых людзей – нядобранадзейныя грамадзяне, якія ставяць пад пагрозу не толькі сваё жыццё, але і акружаючых.
У домаўладанні П.Андрэйчыка з вёскі Андрэйчыкі выявілася не адно парушэнне: у печы вялікая дзірка памерам ледзьве не з цагліну, каля печы знаходзяцца лёгка ўзгараемыя рэчы, а ў электралічыльніку выкарыстоўваўся засцерагальнік тыпу “жучок” з меднага дроту.
У доме У.Шыманскага з Селішча, які адзін выхоўвае траіх дзяцей, праводка патрабуе замены. Печ адрамантавана, але была напалена так, што рэчы, складзеныя побач (у тым ліку і дровы ад падлогі да столі), маглі вельмі лёгка загарэцца.
А вось В.Космач са сваім сужыцелем ужо даўно жывуць без электрычнасці, таму праблемы з праводкай у іх не існуе. Затое эксплуатуюць печ у няспраўным стане і нават не думаюць пра рамонт. І мінулагодні штраф не паўплываў на жыхароў дома ніяк. Паколькі дом належыць гаспадарцы, яны ўпэўнены, што рамонт печы павінны рабіць яе работнікі, як і столі, якая падпёрта бервяном, каб не абвалілася на галаву. Напэўна, спадзяюцца і на тое, што чорнае павуцінне ў доме, якое вісіць над галавой, таксама ўбярэ за іх гаспадарка…
У іх суседзяў таксама няма электрычнасці, печ у лепшым стане, аднак гаспадары не супраць пакурыць у доме, не выходзячы на вуліцу.
Гаспадар дома ў Баяршчыне ўжо ў пажылым узросце, дапамагчы яму, а таксама выпіць разам да яго прыходзіць сябар. Чым могуць скончыцца такія сітуацыі, няцяжка прадбачыць. Большасць пажараў узнікае па адной і той жа схеме: выпіў, закурыў, прылёг з цыгарэтай, заснуў і больш не прачнуўся.
Самае страшнае тое, што ахвярамі агню становяцца дзеці, вельмі часта па віне бацькоў, якія легкадумна адносяцца да іх бяспекі. Жыхар вёскі Крывы Ручэй М.Скрабатун любіць пакурыць у доме, аб чым сведчаць прапаленая бялізна на ложку, а таксама стол, на якім цыгарэты. А ў доме знаходзяцца яшчэ і чацвёра дзяцей. Які прыклад бацька падае сваім дзецям? Чаму яны павінны жыць у пастаянным дымавым воблаку? І нарэшце, чаму ён ставіць пад пагрозу іх здароўе і жыццё? Адказы на гэтыя пытанні пачуць не прыйшлося, бо самога гаспадара дома не было.
Усяго ж падчас рэйду праверана 10 домаўладанняў грамадзян, з усімі жыхарамі якіх праведзены прафілактычныя размовы, інструктаж па пажарнай бяспецы. Парушальнікі панеслі адміністрацыйную адказнасць у выглядзе штрафаў.
На жаль, на некаторых нядобранадзейных грамадзян не дзейнічаюць ніякія штрафы і папярэджанні. І яны па-ранейшаму не задумваюцца, як хутка можа абарвацца бестурботнае жыццё іх і іх родзічаў.
В.ПОЛАЗАВА.