Па інфармацыі РАУС, абстаноўка са злачыннасцю на Ушаччыне застаецца адносна спакойнай. У жніўні ў раёне ўзбуджана толькі пяць крымінальных спраў.
Давер… на паўтысячы
Не перастаюць трапляць даверлівыя ўшачане на ўлоўкі махляроў. На гэты раз у ліку пацярпелых аказалася жанчына 1962 года нараджэння – з яе карт-рахунка, да якога злодзеі атрымалі доступ, знікла 500 рублёў.
“Забыліся” пра дзяцей
Адразу дзве жыхаркі Ушаччыны – 1975 і 1981 гадоў нараджэння – з’яўляючыся абавязанымі асобамі, не лічылі патрэбным плаціць аліменты на сваіх сыноў. Старэйшая больш чым трохмесячную запазычанасць спісвала на адсутнасць заробку (між тым, работу ёй прапаноўвалі), малодшая – на паўналецце нашчадка. Колькі ні нагадвалі апошняй, што такі абавязак з яе не здымуць, пакуль сын вучыцца, за розум усё роўна не ўзялася. Дарэчы, у яе ўжо была судзімасць па такім артыкуле КК Рэспублікі Беларусь.
Поўны камплект
Па адным з адрасоў у вёсцы Станулева ў перыяд з 11 чэрвеня па 4 ліпеня злодзей абчысціў і дваровую тэрыторыю, і гаспадарчыя пабудовы, у якія пранік, вырваўшы дзвярныя прабоі. Сярод яго трафеяў аказаліся металічныя лесвіца, бочка і стэлаж, тры трубы, цыркулярная піла, дзве бараны, акучнік, плуг, медагонка, электрарухавік і іншая маёмасць на агульную суму звыш 580 рублёў.
Засумаваў па кратах
Ураджэнец Турасполля 1978 года нараджэння ўжо быў судзімы за нанясенне чалавеку цяжкіх цялесных пашкоджанняў. Вось толькі шасцігадовае знаходжанне ў месцах не такіх аддаленых нямногаму яго навучыла – калі вызваліўся, працягнуў выпіваць, адсутнічаць у вызначаны час па месцы жыхарства. За парушэнне ўстаноўленых патрабаванняў прэвентыўнага нагляду ў адносінах мужчыны ўзбуджана чарговая крымінальная справа. У бліжэйшы час ён зноў развітаецца з воляй.
Кацярына КАВАЛЕЎСКАЯ.
