Падведзены вынікі раённага этапу рэспубліканскай алімпіяды па вучэбных прадметах сярод навучэнцаў 8-11 класаў. Ладзіўся ён у некалькі дзён, што дазволіла юнакам і дзяўчатам выпрабаваць свае сілы адразу па трох з 14 прадметаў.
Выніковай стала алімпіяда па беларускай мове і літаратуры для дзесяцікласніцы Дамінікі Лапіцкай з Вялікадолецкай школы (настаўнік – Н.К.Спірыдзёнак) – у яе дыплом І ступені. “Бронзавы” вынік прадэманстравалі адзінаццацікласнік з гэтай жа ўстановы Аляксандр Раманоўскі, дзевяцікласніца Дар’я Краснова з Глыбачанскай СШ (Г.В.Казлова) і дзесяцікласніца Анастасія Танана з Арэхаўскай (А.С.Кашко).
Такая ж колькасць дыпламантаў – на алімпіядзе па рускай мове і літаратуры. Тут “срэбра” заваявалі вучаніца 9 класа Ушацкай школы Анастасія Клачок (А.В.Правада) і дзесяцікласніца Анастасія Танана з Арэхаўскай (Н.Л.Корань). Дыпломы ІІІ ступені – у адзінаццацікласніц з райцэнтра Веранікі Гракавай і Вікторыі Салавей (абедзвюх падрыхтавала Л.В.Трафімава).
Па плячы навучэнцам з Ушацкай СШ і англійская мова. Так, дзесяцікласніцы Паліна Салаўёва і Таццяна Кіліна (І.В.Маслоўская) заваявалі “срэбра” і “бронзу” адпаведна. Дыплом ІІ ступені таксама ў адзінаццацікласніка Ягора Обуха (В.А.Мартынюк).
Найбольш паспяхова выступілі прадстаўнікі Ушацкай СШ: на іх рахунку 28 узнагарод па 11 прадметах. Сярод сельскіх лепшы вынік у каманды Арэхаўскай СШ – 8 дыпломаў (для параўнання: у Вялікадолецкай і Глыбачанскай – па 3, Ільюшынскай – 1).
Добра заявілі пра сябе юныя географы. У вучаніцы 9 класа Дар’і Маковіч і дзесяцікласніка Яўгена Талмачова з Ушач (М.У.Малаткавец) – узнагароды ІІ і ІІІ ступені адпаведна. Аднагодка хлопца Валерыя Каўрыжонак з Арэхаўскай школы (Н.А.Мізярска) заваявала “срэбра”, а адзінаццацікласнік Арцём Курыловіч з Ільюшынскай (І.В.Мілая) – “бронзу”.
Па гісторыі не было роўных вучню 11 класа Георгію Грыгор’еву з Глыбачанскай СШ (У.А.Палякоў) і дзесяцікласніцы Валерыі Каўрыжонак з Арэхаўскай (Л.А.Булаўка) – у іх дыпломы ІІ ступені. У аднакласніцы ж дзяўчыны Крысціны Філіпавай – ІІІ.
Па грамадазнаўстве “залатую” ўзнагароду заваявала вучаніца 10 класа Таццяна Кіліна з Ушач (М.У.Міхайлава), “срэбраную” і “бронзавую” – адзінаццацікласнікі Георгій Грыгор’еў з Глыбачкі (У.А.Палякоў) і Аляксандра Пячура з Ушач (У.Л.Хамёнак).
Не падвялі настаўнікаў юныя хімікі з Ушацкай СШ. У дзевяцікласніц Анастасіі Ларчанкі і Ганны Качко (Л.А.Струй) – дыпломы ІІ і ІІІ ступені адпаведна. Гэтак жа размеркавалі ўзнагароды вучні 10 і 11 класаў Кірыл Шук і Іван Чумакоў (А.В.Марозава).
П’едэстал пераможцаў алімпіяды па матэматыцы таксама прадстаўлены пераважна вучнямі Ушацкай школы. Так, першую прыступку заняў дзесяцікласнік Цімафей Ганчаронак (І.Г.Каваленка), трэцюю – васьмікласнікі Міхаіл Зелянік і Аляксандр Калясінскі (Н.М.Герцык), дзевяцікласніца Кацярына Васілеўская (Г.М.Сарокіна). Кампанію ж ім склаў прадстаўнік Арэхаўскай СШ, вучань 11 класа Яўген Ільюшэвіч (Л.М.Шчэкачыхіна) – у яго “срэбра”.
Самымі папулярнымі сталі матэматыка, якая сабрала 13 удзельнікаў, грамадазнаўства – 11, геаграфія – 10.
Лепшы вынік па фізіцы прадэманстравалі навучэнцы В.М.Герцыка з Ушач: дзевяцікласніца Аліна Хамёнак і дзесяцікласнік Цімафей Ганчаронак – у іх дыпломы ІІ і ІІІ ступені, а таксама вучань 11 класа з Арэхаўна Яўген Ільюшэвіч (В.І.Карчэўскі) – у яго “бронза”.
Адразу чацвярых ушацкіх дыпламантаў па біялогіі падрыхтавала В.А.Жыткая. “Золата” заваявала дзесяцікласніца Ксенія Барысёнак, “срэбра” – яе аднагодка Паліна Юркевіч, а таксама дзевяцікласніца Паліна Аўласенка і адзінаццацікласніца Вераніка Гракава. “Бронза” ж дасталася вучаніцы 10 класа Дамініцы Лапіцкай з Вялікадолецкай СШ (В.М.Шышоў).
Удалай для дваіх школьнікаў стала алімпіяда па фізічнай культуры і здароўі. Дыпломы ІІІ ступені на ёй заваявалі адзінаццацікласніца Марыя Харак з Ушацкай СШ (Ю.М.Красілевіч) і дзесяцікласнік Кірыл Пранік з Арэхаўскай (У.М.Магілін).
Па працоўным навучанні “срэбра” і “бронзу” заваявалі дзевяцікласнік Арсеній Глінскі і васьмікласнік Павел Шайтар з Ушацкай школы (абодва – выхаванцы Д.П.Дразда). Сярод жа дзяўчат лепшай стала дзевяцікласніца Кацярына Васілеўская з гэтай жа навучальнай установы (А.У.Жарнасек).
Напачатку 2024 года на Віцебшчыне пройдзе абласны этап алімпіяды. Пажадаем юным інтэлектуалам нашага раёна новых перамог.
Кацярына КАВАЛЕЎСКАЯ.
