Работнікамі Ушацкага райаддзела па надзвычайных сітуацыях падчас прафілактычных мерапрыемстваў па вадаёмах раёна праведзены маніторынг таўшчыні лёду.
Так, на канец мінулага тыдня ні на адным з вадаёмаў таўшчыня покрыва не дасягнула бяспечных значэнняў у 7-10 см. Нагадаем, што на тэрыторыі раёна і па вобласці ў цэлым дзейнічае забарона выхаду на лёд. Між тым, аматарам рыбнай лоўлі не церпіцца атрымаць асалоду ад зімовай рыбалкі і многія ігнаруюць папярэджанні і забароны. На мінулым тыдні ў Міёрскім раёне патануў 49-гадовы рыбак: на адлегласці 30 метраў ад берага ён зрабіў лунку і праваліўся пад лёд. Пра выратавальную камізэльку і іншыя сродкі, якія б дапамаглі яму пратрымацца на плыву, грамадзянін не паклапаціўся.
Не спяшайцеся на рыбалку, беражыце жыццё! Бацькам трэба лішні раз нагадаць дзецям пра небяспеку гульняў каля вадаёмаў.