У першы дзень лютага ўвагу наведвальнікаў спарткомплексу прыцягнулі юнакі і дзяўчаты ў яркіх касцюмах, якіх з караваем сустракала першы сакратар райкама БРСМ Рыта Хрыпель. Ва Ушачы прыбылі ўдзельнікі чацвёртага сезона рэспубліканскага патрыятычнага праекта “Зімовы маршрут”.
Сёлета ён прысвечаны 80-годдзю вызвалення Беларусі ад нямецка-фашысцкіх захопнікаў і ставіць на мэце развіваць патрыятызм, працоўны і творчы патэнцыял моладзі, прапагандаваць здаровы лад жыцця. Стартаваў маршрут у Магілёве, а па ходзе да студатрадаўцаў далучыліся актывісты ВНУ Віцебшчыны.
Галоўнай кропкай наведвання ў нашым раёне стала Ушацкая СШ. Мерапрыемствы пачаліся з лінейкі, дзе ўдзельнікаў праекта вітала кіраўніцтва раёна і школы. Падчас тэматычных заняткаў па класах госці расказвалі аб дзейнасці БРСМ, укладзе студатрадаў у эканамічнае развіццё краіны, дзяліліся сваім вопытам работы.
– Для дзяцей кожнага ўзросту распрацавана асобная праграма, – расказвае Рыта Хрыпель. – Для пачаткоўцаў праводзяцца майстар-класы па дэкаратыўна-прыкладным мастацтве, з пяцікласнікамі разважаюць над тым, каго можна назваць патрыётам, старэйшыя вучні з цікавасцю слухаюць пра атамную энергетыку і БелАЭС, глядзяць відэаролікі аб навучальных установах студатрадаўцаў.
Азартна праходзіла спартыўна-гульнявая праграма “Хутчэй. Вышэй. Мацней”. Апладысментамі суправаджаліся канцэртныя нумары. Усім школам, дзе праходзіць праект, перадаецца яго сімвал – сняжынка, аб’яднаная з компасам.
Для гасцей была арганізавана экскурсія ў музей народнай славы імя У.Е.Лабанка і на мемарыяльны комплекс “Прарыў”. А маршрут працягнуўся далей.
Караліна КЛАЧОК.
