На гэтым тыдні ва Ушачах пад кіраўніцтвам намесніка старшыні Віцебскага аблвыканкама Вячаслава Дурнова прайшла нарада па правядзенні гэтага маштабнага мерапрыемства. Канцэпцыю абмеркавалі ў тым ліку і на галоўнай лакацыі – мемарыяльным комплексе “Прарыў”.
Сёлета акцыя, якая пройдзе ў дзявяты раз, будзе асаблівай, бо прымеркавана да 80-годдзя вызвалення Беларусі ад нямецка-фашысцкіх захопнікаў і 80-й гадавіны прарыву варожай блакады партызанамі Полацка-Лепельскай зоны, да таго ж сёлета спаўняецца 50 гадоў з моманту адкрыцця нашага мемарыяла.
Ва Ушачы прыбудуць дэлегацыі ўсіх рэгіёнаў Віцебшчыны, а таксама прадстаўнікі Пскоўскай і Смаленскай абласцей Расійскай Федэрацыі. Сярод гасцей будуць члены ваенна-патрыятычных клубаў, школьнікі і студэнты, маладзёжныя актывісты, прадстаўнікі працоўных калектываў і грамадскіх арганізацый. Відовішчным абяцае быць аўтапрабег, у ваенныя часы ўдзельнікі мерапрыемства перанясуцца падчас рэканструкцыі бою на “Прарыве”.
Ужо стала традыцыяй прымяркоўваць да гэтага мерапрыемства і адкрыццё розных сацыяльных аб’ектаў. Плануецца, што ў рамках акцыі чырвоная стужка будзе перарэзана на новым інтэрнаце для спартсменаў каля фізкультурна-аздараўленчага комплексу.
Вольга КАМАРКОВА.
