Хор народнага клуба “Ветэран” Ушацкага раённага цэнтра культуры годна выступіў на абласным аглядзе-конкурсе творчасці ветэранскіх калектываў “Не старэюць душой ветэраны”, які прысвячаўся 80-й гадавіне вызвалення Беларусі ад нямецка-фашысцкіх захопнікаў. Калектыву ўручаны дыплом лаўрэата ІІІ ступені ў намінацыі “Харавыя спевы”.
Як адзначыла кіраўнік клуба Іна Клімава, конкурс быў вельмі прадстаўнічы, у ім прынялі ўдзел 74 калектывы і 62 індывідуальныя выканаўцы, таму складана было наогул вытрымаць гэты марафон. Ды і канкурыравалі на роўных як невялікія сельскія раёны, як наш, так і Полацкі, Аршанскі, таму званне лаўрэатаў безумоўна грэе душу.
Падводзячы вынікі, журы адзначыла наш калектыў як адзін з самых актыўных. Мяркуйце самі, з 9 намінацый ушачане ўдзельнічалі ў трох і літаральна ва ўсіх аказаліся ў ліку пераможцаў. Самае высокае месца – дыплом лаўрэата ІІ ступені за чытацкае выкананне гумарэскі “Жонка-маёр” атрымаў Рыгор Уладзіслававіч Іваноўскі. Дыпламантамі І ступені ў гэтай жа намінацыі сталі нашы вядомыя майстры слова Людміла Міхайлаўна Мядзведзева і Тамара Паўлаўна Залатухіна. З такім жа званнем толькі ў намінацыі “Сольныя спевы” вярнулася Лілія Міхайлаўна Мураўская.
Што датычыцца хору, то ў яго рэпертуары шмат твораў ваеннай тэматыкі, аднак да выступлення яго абнавілі, далучыўшы, напрыклад, песню “Героі нашы – ветэраны” на словы і музыку ўшачаніна Уладзіміра Нікіценкі. А творам “Хлеб усяму галава” ўшанавалі памяць аб пасляваенным подзвігу беларусаў па аднаўленні народнай гаспадаркі.
Нашы ветэраны вельмі ўдзячны за дапамогу, якую аказаў запрошаны ў якасці акампаніятара ветэран працы Сяргей Васільевіч Парашкін. За вельмі кароткі час усе нумары перабудавалі пад музыку, што паспрыяла ўдаламу выступленню нашага калектыву.
Вольга КАРАЛЕНКА.
