З пачатку года на вадаёмах краіны патанула 207 чалавек, з іх 9 дзяцей. Сіламі работнікаў таварыства выратавання на водах і МНС атрымалася захаваць жыццё 180 дарослых і 39 непаўналетніх.
У параўнанні з мінулым годам тапельцаў у рэспубліцы стала менш, а вось на Віцебшчыне, на жаль, наадварот, паболела: 52 чалавекі, гэта на 11 больш, чым летась.
Прывяду прыклад, які яскрава сведчыць, што на вадзе трэба быць максімальна асцярожнымі, не рабіць неабдуманых дзеянняў, не пакідаць дзяцей адных. У мінулыя выхадныя на беразе Дняпроўска-Бугскага канала, што на Брэстчыне, адпачывала кампанія дарослых і дзяцей. Малады чалавек вырашыў пакупацца і ўзяў з сабой сямігадовую дзяўчынку, пасадзіўшы яе на плечы. Яны гулялі ў 15-20 метрах ад берага, у нейкі момант мужчына страціў сілы і пачаў тануць, ён змог адштурхнуць ад сябе дзіця, а сам пайшоў пад ваду. Другая 11-гадовая дзяўчынка, якая знаходзілася на беразе, убачыла, што яе сястра тоне, апранула выратавальную камізэльку, самастойна кінулася ў ваду і змагла выцягнуць сястрычку. Цела маладога чалавека знайшлі вадалазы на дне ў 20 метрах ад берага. Купанне ў гэтым месцы забаронена, аб чым папярэджвалі спецыяльныя таблічкі.
Вялікую прафілактычную работу разам з усімі зацікаўленымі службамі пастаянна праводзім і мы. Кожны тыдзень праходзяць рэйды па азёрах Ушаччыны ў рамках акцый “Бяспечнае лета”, “Водны дазор”, “Летні патруль”.
Хоць на вуліцы пахаладала, але паплаваць і адпачыць ля вадаёмаў яшчэ нямала жадаючых. Прытрымлівайцеся правіл бяспекі, каб апошнія летнія дні прынеслі вам радасць!
Мая ПАЦЭЙКА, старшыня раённай арганізацыі таварыства выратавання на водах.
