“Флікер дома забыліся…” Прыкладна так спрабуюць апраўдацца пешаходы, якія за невыкарыстанне ў цёмны час сутак святлоадбівальных элементаў трапляюць у поле зроку праваахоўнікаў.
Прычым, такую забыўчывасць на Ушаччыне маюць многія, што пацвердзіў наш нядаўні рэйд з супрацоўнікамі аддзялення ДАІ райаддзела міліцыі па дарогах раёна.
А шостай гадзіне вечара выязджаем з райцэнтра ў бок Кубліч. У суботу пешаходаў ля праезнай часткі няшмат – але ж нагоду, каб спыніцца, чакаць не даводзіцца. Жанчына ў цёмным паліто крочыць па краі неасветленай дарогі – нават пад фарамі яе цяжка ўбачыць. Добра, што хоць выбрала правільны бок – насустрач руху транспарту, а так чакай бяды – і пры невялікай хуткасці аўтамабіля пазбегнуць наезду было б праблематычна.
– Флікер зніжае рызыку такіх аварый ажно на 65 працэнтаў, – нагадвае начальнік АДАІ Мікалай Гаўрылюк. – Калі вадзіцель едзе з хуткасцю 90 км/г, то ў яго будзе 8 секунд, каб заўважыць пазначанага такім чынам чалавека і спыніцца, а пры руху 60 км/г – 24.
Грамадзянка паабяцала на ўвесь асенне-зімні сезон, калі позна світае і рана вечарэе, надзейна прымацаваць флікеры да сумкі і адзення. На першы раз яна атрымала папярэджанне, як і яшчэ два пешаходы, якіх сустрэлі ў гэты вечар без неабходных “светлавых” пазнак.
Трапіў пад увагу і адзін веласіпедыст, які ехаў без святлоадбівальнай камізэлькі, а таксама ліхтароў белага і чырвонага колеру на транспартным сродку.
– Не думаў, што на рабоце так доўга затрымаюся, вось і не апрануўся належным чынам, – тлумачыў мужчына. – І практычна на ўсім маім шляху ёсць ліхтары…
М.Гаўрылюк нагадаў, што камізэлькі павышанай бачнасці веласіпедысты павінны выкарыстоўваць у цёмны час сутак у абавязковым парадку – незалежна ад таго, асветлены ўчастак дарогі, па якім едуць, ці не. Дарэчы, і для пешаходаў такі элемент (замест простага флікера, а лепш – разам з ім!) будзе вельмі дарэчы.
На жаль, жыхары раёна пакуль не ставяцца да пытанняў уласнай бяспекі з належнай адказнасцю: сёлета ў ліку парушальнікаў Правілаў дарожнага руху аказалася 260 пешаходаў і 76 веласіпедыстаў (з іх 53 і 17 адпаведна знаходзіліся ў стане алкагольнага ап’янення). Без флікераў па дарогах гулялі 142 чалавекі (32).
Кацярына КАВАЛЕЎСКАЯ
