Абласны форум для маладых спецыялістаў аграпрамысловага комплексу сабраў на гэтым тыдні ў Пастаўскім раёне амаль паўтары сотні работнікаў сферы з розных рэгіёнаў Віцебшчыны.
У цікавым мерапрыемстве прынялі ўдзел і прадстаўнікі ўшацкіх гаспадарак, а таксама райветстанцыі. Маладыя аграрыі наведалі вядучыя сельгаспрадпрыемствы, убачылі, як працуе Пастаўскі малочны завод, пазнаёміліся з перадавымі тэхналогіямі на рабатызаванай ферме ААТ “Хацілы-Агра”, наведалі сучасны малочна-таварны комплекс у “Навасёлках-Лучай”, а таксама Пастаўскі льнозавод.
У праграме форуму быў і адкрыты дыялог моладзі з першым намеснікам старшыні Віцебскага аблвыканкама Сяргеем Ляўковічам і памочнікам Прэзідэнта – інспектарам па Віцебскай вобласці Уладзімірам Юргевічам.
Ушачане актыўна ўключыліся ў размову і задавалі хвалюючыя пытанні. Галоўнымі тэмамі для абмеркавання сталі сацыяльная падтрымка моладзі, кар’ерныя перспектывы для маладых кіраўнікоў, стымулюючыя выплаты і многае іншае.
Сяргей Ляўковіч, першы намеснік старшыні Віцебскага аблвыканкама:
“Сёлета на Віцебшчыну прыбылі 322 маладыя спецыялісты. Форум – гэта добрая магчымасць пачуць ад маладых людзей, наколькі яны адчуваюць прадметную дапамогу і падтрымку на месцах, да чаго імкнуцца, пра што мараць, ці гатовыя да адказнасці. Пачутыя прапановы абавязкова будуць улічаны”.
Вольга КАМАРКОВА
