Першыя снегапады сёлета толькі крыху не дачакаліся старту каляндарнай зімы. І пакуль рамантычныя ўшачане лавілі ў аб’ектывы фотакамер прыгожыя пейзажы, а дзеці ўзнаўлялі навыкі па лепцы снегавікоў, дарожнікі і камунгасаўцы пераходзілі на ўзмоцнены рэжым работы.
Як патлумачылі нам ва ўшацкім камунальным прадпрыемстве, да пачатку зімовага сезона тут у цэлым падрыхтаваліся. Для ўборкі і вывазкі снегу, іншых аперацый вылучана 17 адзінак тэхнікі – у тым ліку два вялікія МАЗы, 5 амкадораў, аўтагрэйдар і розныя па магутнасці трактары.
Нарыхтавана каля паўтысячы тон пясчана-салявой сумесі, якая дапаможа аўтамабілістам і пешаходам спраўляцца з наступствамі галалёдзіцы.
Гатовы да экстрэмальных працоўных змен, якія ў гэтыя дні распачыналіся а чацвёртай гадзіне раніцы, вадзіцелі і трактарысты. “Усе мае калегі – сапраўдныя прафесіяналы, правялі за рулём не адзін напружаны сезон. Пастараліся мы годна падрыхтаваць да зімовых выпрабаванняў і тэхніку”, – падзяліўся з намі вопытны работнік Віктар Сіротка.
“Працуем адпаведна графіку. Вядома ж, у першую чаргу ўбіраем цэнтральныя вуліцы, прыпынкі, пад’езды да сацыяльных аб’ектаў, аднак стараемся аператыўна навесці парадак і на іншых дарогах”, – зазначае дырэктар УП ЖКГ Сяргей Герасімёнак.
Раней звычайнага бяруцца за справу і шасцёра прыбіральшчыкаў тэрыторыі ўчастка добраўпарадкавання. “Каб людзям было зручна ісці на работу, па тратуарах цэнтральных вуліц зранку праязджаюць маленькія трактары – спачатку адзін з лапатай і шчоткай, за ім другі – з раскідвальнікам сумесі. Мы ж тым часам расчышчаем пешаходныя пераходы, ліўнёўкі, шляхі, што вядуць да школы, іншыя бойкія месцы, – тлумачыць работніца ўчастка Кацярына Мелкамукава. – Хоць выпала яшчэ не так шмат снегу, аднак у пачатку тыдня ўжо вывезлі з плошчы першыя чатыры машыны зімовага грузу”.
Дарэчы, не ўсе пешаходныя шляхі ў райцэнтры магчыма хутка пачысціць з дапамогай тэхнікі, таму нагадваем, што калі няма магчымасці рухацца па тратуары ці абочыне, то можна ісці па краі праезнай часткі па левым баку (насустрач руху транспарту) і, канечне, у цёмны час сутак абавязкова з флікерам.
Запасаемся лапатамі!
Варта нагадаць, што і ў грамадзян ёсць абавязкі па ўхіленні наступстваў снегападаў. Раскажа пра гэта галоўны спецыяліст аддзела архітэктуры, будаўніцтва і жыллёва-камунальнай гаспадаркі райвыканкама Аксана Мялешка:
– 16 мая бягучага года ўступіла ў сілу новая пастанова Саўміна, якая змяніла патрабаванні Правілаў добраўпарадкавання і ўтрымання населеных пунктаў. Калі вы жывяце ў прыватным доме, то павінны самастойна чысціць снег не толькі ва ўласным двары, а і на шляху ад свайго ўчастка да тратуара ці, калі яго няма, да праезнай часткі вуліцы. Што да арганізацый, дык ім трэба самім клапаціцца пра тое, каб з бліжэйшай дарогі да іх тэрыторыі маглі падысці людзі і пад’ехаць транспарт.
З’явілася і яшчэ адна важная норма: грамадзяне і юрыдычныя асобы, якія паркуюць свае машыны на прыдамавых тэрыторыях, праездах, павінны своечасова чысціць снег на адлегласці не менш 1 метра вакол транспартнага сродку. За парушэнне прадугледжана адміністрацыйная адказнасць да 25 базавых велічынь.
Падрыхтавала Наталля БАГДАНОВІЧ
