Раённы этап рэспубліканскай алімпіяды па вучэбных прадметах сёлета аказаўся “прызавым” адразу для паўсотні юнакоў і дзяўчат Ушаччыны. Пра высокі ўзровень падрыхтоўкі вучняў 8-11 класаў сведчыць і той факт, што неабходныя для заваявання дыпломаў балы набраў практычна кожны другі ўдзельнік.
Як расказалі ў аддзеле па адукацыі райвыканкама, удзел у алімпіядзе прынялі прадстаўнікі ўсіх школ раёна. Прычым, выпрабаваць свае сілы кожны мог адразу па двух прадметах. Традыцыйна самымі актыўнымі аказаліся вучні Ушацкай СШ: на іх рахунку 57 іспытаў і 35 дыпломаў. Сярод сельскіх школ найлепшыя вынікі паказалі Арэхаўская і Глыбачанская – у іх 7 і 6 узнагарод адпаведна (дарэчы, першая трымае такое лідарства трэці год запар).
Беларуская мова і літаратура. Па гэтым прадмеце сёлета не было роўных дзевяцікласніцы Таццяне Сазонавай (настаўнік – А.Кашко) і адзінаццацікласніцы Дар’і Маковіч (І.Леснічэнка) з Арэхаўскай і Ушацкай школ – у абедзвюх “золата”. У дзевяцікласніц з гэтых жа ўстаноў Васілісы Варавы і Марыі Пракудзінай – дыпломы ІІ і ІІІ ступені адпаведна. “Бронзу” заваяваў таксама вучань 11 класа Данііл Рэут (Н.Спірыдовіч) з Вялікадолецкай СШ.
Руская мова і літаратура. На першай прыступцы п’едэстала аказаліся Ангеліна Быкава (10 клас, К.Літвін) з Глыбачанскай школы і Анастасія Клачок (11-ы, Л.Трафімава) з Ушацкай. “Срэбра” – у дзевяцікласніцы з райцэнтра Марыі Струй (А.Правада), узнагароды ІІІ ступені – у яе аднагодак Васілісы Варавы і Таццяны Сазонавай (Т.Неруганёнак) з Арэхаўскай СШ.
Геаграфія. Тут усё проста: па адным дыпломе ІІІ ступені на кожную паралель. Заваявалі іх Уладзіслаў Кучынскі і Соф’я Палонская (9 і 10 клас, К.Гірсёнак) з Арэхаўскай школы і Аліна Хамёнак (11-ы, М.Малаткавец) з Ушацкай.
Матэматыка. Гэтая дысцыпліна аказалася самай прадстаўнічай. У ліку дыпламантаў – дзевяцікласніца Уладзіслава Урбан (А.Храпавіцкая) з Ільюшынскай школы, а таксама 7 прадстаўнікоў Ушацкай: вучні 8 класа Ілья Сляцкі і Ілья Мялешка, 9-га – Міхаіл Падворны і Аляксандра Міхейка, 10-га – Ірына Коршун і Аляксандр Калясінскі, 11-га – Анастасія Ларчанка. Юнакоў і дзяўчат, якія заваявалі “срэбраныя” і “бронзавыя” ўзнагароды, падрыхтавалі Н.Герцык і І.Каваленка.
Фізіка. Не падвялі свайго настаўніка В.Герцыка вучні з Ушач Міхаіл Падворны і Павел Маковіч (9 клас), Арына Апёнак (10), Аліна Хамёнак і Дар’я Маковіч (11) – на іх рахунку “срэбра” і “бронза”.
Замежныя мовы. Па англійскай на пераможным п’едэстале аказаліся вучаніцы 11 класа Ушацкай СШ Анастасія Клачок і Яраслава Ліпаўка (І.Маслоўская) – у іх узнагароды І і ІІ ступені. Па нямецкай – дзесяцікласніца Ангеліна Быкава (Т.Церашкавец) і будучая выпускніца Аляксандра Сіскевіч (Д.Герцык) з Глыбачанскай, у якіх адпаведна “срэбра” і “бронза”.
Біялогія. У гэтай дысцыпліне лепшымі сталі вучні Ушацкай школы, выхаванцы А.Жук. Дыпломы ІІ і ІІІ ступені – у дзесяцікласніц Васілісы Арцюх, Вікторыі Байцовай і Паліны Скрыпко, адзінаццацікласніц Ганны Качко і Дзіяны Булаўка.
Хімія. Нагода парадавацца за сваіх вучаніц была і ў настаўнікаў А.Марозавай, Л.Струй з Ушач. У дзесяцікласніцы Дар’і Жахоўскай – “срэбраны” вынік, а ў адзінаццацікласніц Анастасіі Ларчанкі і Ганны Качко – “золата” і “бронза”.
Грамадазнаўства. Тут усяго два дыпломы ІІІ ступені: у дзесяцікласніцы Ксеніі Церашкавец (У.Хамёнак) з Глыбачанскай СШ і адзінаццацікласніцы Паліны Аўласенкі (М.Міхайлава) з Ушацкай.
Гісторыя. І па гэтым прадмеце парадавалася Марына Уладзіміраўна за сваіх выхаванцаў. Узнагарода вышэйшай пробы – зноў у Паліны Аўласенкі, ІІІ ступені – у дзесяцікласніка Дзмітрыя Чабатара.
Працоўнае навучанне. Сярод хлопцаў лепшы вынік паказалі дзевяцікласнікі Станіслаў Сісковіч і Цімур Паршонак (Д.Дрозд) з Ушацкай школы – у іх дыпломы ІІ і ІІІ ступені, а таксама вучань 10 класа Ягор Кучаронак (М.Казлоў) з Глыбачанскай – ІІІ. Сярод дзяўчат уладальніцамі “срэбранай” і “бронзавай” узнагарод сталі вучаніца 8 класа Лізавета Шыла (А.Жарнасек) з Ушач і дзевяцікласніца Валерыя Троцкая (І.Сяліцкая) з Глыбачкі.
Фізічная культура і здароўе. Дыпломы І ступені заваявалі дзевяцікласнік Руслан Аляксееў (Ю.Красілевіч) і адзінаццацікласніца Анастасія Лёля (Д.Падгол) з Ушацкай СШ, ІІ – вучань 10 класа Арцём Кучаронак (Д.Нераз) з Арэхаўскай.
Напачатку 2026 года ў школьнікаў – абласны этап алімпіяды. Да ўдзелу ў ім запрошаны Анастасія Клачок – па рускай мове і літаратуры, Аліна Хамёнак – па фізіцы, Анастасія Ларчанка і Дар’я Жахоўская – па хіміі, Аляксандра Сіскевіч – па нямецкай мове. У рэзерв увайшлі Ганна Качко – па хіміі, Ангеліна Быкава – па нямецкай мове. Жадаем юным інтэлектуалам новых перамог!
Кацярына КАВАЛЕЎСКАЯ
