Як тэатр пачынаецца з вешалкі, так і суд у пэўным сэнсе пачынаецца з канцылярыі. Штодзень яна прапускае праз сябе ўсе важныя дакументы. Ад дакладнай работы загадчыка залежыць правільнае, своечасовае афармленне карэспандэнцыі, улік крымінальных, грамадзянскіх спраў, адміністрацыйных матэрыялаў… У судзе нашага раёна пяты год за гэта адказвае Жанна Храмёнак.
Назіраю за работай ураджэнкі райцэнтра. Стосы папак і папер, мноства тэлефонных званкоў з пытаннямі, неабходнымі ўдакладненнямі. Ды і дзверы тут звычайна адчынены, бо часта заходзяць людзі. Кожнага загадчык канцылярыі сустракае ветліва, бо тыя нярвуюцца: прыводзяць сюды як правіла непрыемныя, а часам надзвычайныя сітуацыі. Многія зусім не арыентуюцца ў юрыдычнай дакументацыі, тэрміналогіі – даводзіцца па некалькі разоў тлумачыць, удакладняць. Зрэшты, сама Жанна Васільеўна вывучала гэта адносна нядаўна, бо дагэтуль мела справу з лічбамі – працавала вядучым эканамістам.
– Любы дакумент, – кажа Ж.Храмёнак, – праходзіць пярвічную апрацоўку і рэгістрацыю, разглядаецца старшынёй суда і перадаецца выканаўцу, кантралюецца і трапляе ў архіў. Для таго, каб гэты ланцужок-механізм працаваў зладжана, і існуе канцылярыя. Сваю работу шчыра люблю, таму часта прыходжу раней патрэбнага – каб усё некалькі разоў пераправерыць, бо як паказвае практыка, нават ад аднаго няправільна пастаўленага знака прыпынку залежыць вельмі многае.
Кацярына КАВАЛЕЎСКАЯ
