Да акцыі “Нашы дзеці” далучылася Віцебская абласная асацыяцыя мясцовых Саветаў дэпутатаў. Член Савета Рэспублікі Нацыянальнага сходу Рэспублікі Беларусь, старшыня райсавета Наталля Марковіч пабывала ў дзвюх ушацкіх сем’ях, дзе выхоўваюцца дзеці з асаблівасцямі развіцця, і перадала ім падарункі ад дэпутацкага корпуса Віцебшчыны.
У абодвух юных ушачан маюцца праблемы з апорна-рухальным апаратам, а таму для іх набылі падарункі, якія будуць выкарыстоўвацца ў працэсе рэабілітацыі. 17-гадовага Івана Асіпёнка выхоўвае бабуля Ніна Мікалаеўна. “Летам наш Ваня ездзіць па вясковай вуліцы на спецыяльным трохколавым веласіпедзе, а вось у халодны час у асноўным знаходзіцца ў хаце і яму не хапае рухальнай актыўнасці, таму велатрэнажор будзе нам вельмі дарэчы!” – шчыра дзякавала жанчына за карысную рэч. А маленькі жыхар райцэнтра Рома Плігаўка адразу ж прымусіў тату распачаць зборку “стэпера” – гэтае прыстасаванне, якое імітуе хадзьбу, дапаможа хлопчыку ўмацаваць мышцы ножак.
“Вельмі хочацца, каб у новым годзе ўсе нашы дзеткі сябе добра адчувалі, а дарослыя заставаліся для іх надзейнай апорай, знаходзілі сілы процістаяць складаным жыццёвым выпрабаванням”, – зазначыла Наталля Мікалаеўна.
