Пачынаецца купальны сезон, і ўшацкія пляжы актыўна рыхтуюцца да прыняцця адпачываючых. У суботу чатыры вадаёмы былі абследаваны вадалазамі – допуск спецыялістаў атрымалі пляжы на рацэ Ушача, азёрах Вечалле і Чаравэчча, а таксама месца адпачынку ля аграсядзібы “Мікалаеўскі пасад” на возеры ў Сержанах. У хуткім часе будуць абследаваны пляжы лагера “Турасполле” на рацэ Дзіва і санаторыя “Лясныя азёры” на Должыцы. З мінулай суботы ўжо пачалі несці сваю вахту на Вечаллі работнікі выратавальнага паста, а камунальная служба заканчвае работу над добраўпарадкаваннем пляжаў, рыхтуючы іх да афіцыйнай прыёмкі.
Хутка берагі нашых рэк і азёр запоўняць адпачываючыя, а таму дарэчы будзе нагадаць асноўныя правілы бяспекі падчас знаходжання на вадаёмах. Забараняецца купацца ў непрызначаных для гэтага месцах: кар’ерах, саджалках, пажарных вадаёмах і г.д., распіваць на пляжы спіртныя напіткі і заходзіць у ваду ў стане ап’янення. Нельга пакідаць ля вадаёмаў дзяцей без нагляду дарослых. Смяротную небяспеку для жыцця ўяўляе плаванне на плытах, дошках, камерах і іншых падобных сродках – усе, напэўна, памятаюць мінулагоднюю трагедыю ў Сенненскім раёне, калі на саджалцы падчас плавання на плыту патанула трое дзяцей.
Хочацца спадзявацца, што надыходзячы летні сезон прынясе ўшачанам толькі станоўчыя эмоцыі.
Э.ВЕРТАШОНАК, старшыня раённага таварыства выратавання на водах.
