З-за працяглых халадоў сёлетні веснавы сельскагаспадарчы кірмаш будзе праводзіцца амаль на два тыдні пазней мінулагодняга – ушачан чакаюць на цэнтральнай плошчы гарпасёлка ў нядзелю, 15 красавіка. Як нам паведамілі ва ўпраўленні сельскай гаспадаркі і харчавання райвыканкама, улічаны пажаданні насельніцтва пры правядзенні мінулых кірмашоў, таму сёлета будзе прадстаўлены шырокі асартымент прадукцыі – традыцыйна можна будзе набыць насеннае і фуражнае зерне, саджанцы пладовых дрэў і кустоў, ялавічыну, свініну, мяса птушкі, сродкі догляду за раслінамі, садовы інвентар, рыбу, курэй і маладняк буйной рагатай жывёлы, іншыя харчовыя і прамысловыя тавары. Дарэчы, арганізатары прапануюць ушачанам не толькі прыходзіць за пакупкамі, а і самім паўдзельнічаць у арганізацыі кірмашу: парасят, курэй, трусоў, бульбу, зерне і іншыя лішкі сельскагаспадарчай прадукцыі могуць прадаваць не толькі ўстановы гандлю, сельгаспрадпрыемствы і прыватныя фірмы, а і грамадзяне – для гэтага дастаткова даведкі аб наяўнасці ў чалавека асабістай падсобнай гаспадаркі.
Афіцыйнае адкрыццё кірмашу – 9 гадзін, але ўжо з 7.00, з пачатку заезду ўдзельнікаў, рух аўтатранспарту праз плошчу будзе абмежаваны. Таксама трэба адзначыць, што райспажыўтаварыства зноў акажа запатрабаваную паслугу па дастаўцы тавараў да месца жыхарства пакупнікоў.
