Амаль увесь састаў Ушацкага ўчастка дарожна-эксплуатацыйнага ўпраўлення №37 г.Лепель знаходзіўся паміж Арэхаўнам і Сарочынам. Дарэчы, як і летась прыкладна ў такі ж час. І гэтая заканамернасць тлумачыцца проста. Як толькі спадаюць моцныя маразы і агаляецца палатно, дарожнікі прыступаюць да ямкавага рамонту. І, канечне, пачынаюць з самай бойкай трасы. 
Адзінае, у чым было адрозненнем, гэта ў тэхналогіі. Калі летась прымянялі зімовую, то сёлета “пераабуліся раней”. Толькі ў Арэхаўне, дзе абнаўлялі з’езд да магазіна, і непасрэдна за аграгарадком яшчэ можна было ўбачыць чорныя прамавугольнікі роўных форм – прыкмета таго, што стары асфальт выразаўся фрэзай. Было гэта ў пачатку сакавіка, а далей ужо без яе, паколькі сёлета раней усталяваліся плюсавыя тэмпературы. Летні метад закладкі ям больш хуткі, і ў гэтай дапамозе надвор’я начальнік участка Пётр Пятровіч Кляшчонак бачыць маленькі выйгрыш у часе:
– Ямкавы рамонт – справа заканамерная, у нашай паласе з такімі перападамі маразоў і адліг асфальтавае палатно не можа выстаяць, тым больш калі яно не новае, вось з кожным годам выбоін і становіцца ўсё больш, а за красавік трасы павінны быць адрамантаваны, адноўлена разметка, прыведзены ў парадак павільёны і знакі.
А каб усё паспець, на аб’ект адначасова выстаўляецца і новы рэцыклер, і старая бочка для прыгатавання эмульсіі. Такім чынам адразу рыхтуецца 5 тон і заліваецца засыпаны ў падсушаныя ямкі таксама сухі шчэбень. Потым трамбуецца вібраплітой для добрага счаплення са старым асфальтам. Рабіць гэта прасцей і хутчэй, чым закладваць у выбоіны “халодны асфальт”.
Дарэчы, каб справіцца з вялікім аб’ёмам, дарожнікі працуюць без выхадных. А з красавіка мяркуецца прыцягнуць да сезонных работ яшчэ чатырох рознарабочых.
Вольга Караленка.
На здымку: Валерый Сямёнавіч Баеў, Аляксандр Канстанцінавіч Шараг, Уладзімір Анатольевіч Ізмайловіч, Рыгор Захаравіч Шарамет, Канстанцін Мікалаевіч Баркоўскі, Васіль Іванавіч Александровіч, брыгадзір Андрэй Анатольевіч Ізмайловіч.
