Падчас вытворчай нарады старшыня райвыканкама Алег Анатольевіч Кавалёнак паставіў перад кіраўнікамі арганізацый задачы, якія былі акрэслены на селектарнай нарадзе губернатарам вобласці. Тэрмінова трэба звезці з палёў салому, таму дапамогу гаспадаркам тэхнікай будуць аказваць прадпрыемствы раёна.
Паколькі спрыяе надвор’е, кожны дзень на ўборку льну накіроўваецца па 150 чалавек з арганізацый раёна, столькі ж шэфаў з Полацка, таксама прыцягваюцца да сельгасработ вучні школ, якія знаходзяцца бліжэй да льняных палеткаў. Рулоны, якія будуць запрасаваны, тэрмінова павінны звозіцца, дапамогу ў гэтым ільнозаводу таксама будуць аказваць прадпрыемствы раёна.
Неабходна актывізаваць будаўніцтва другога пускавога комплексу малочнатаварнай фермы Завячэлле, таму работы зладжана павінны весці не толькі ПМК-66, але і меліяратары, дарожнікі, самі заказчыкі – “Райаграсервіс”.
Каб навесці належны парадак ва ўсіх населеных пунктах, у раёне аб’яўлены адзіны санітарны тыдзень.
Будуць актывізаваны сельскагаспадарчыя работы – уборка кукурузы, сяўба азімых, якія марудна вяліся з-за дажджоў.
Перад заатэхнічнай службай раёна пастаўлена задача да 20 кастрычніка на базе адной з гаспадарак сабраць гурт буйной рагатай жывёлы мяснога напрамку пароды герэфорды, якія будуць утрымлівацца па асаблівай тэхналогіі.
В.КАРАЛЕНКА.