Тамара Бородёнок уже 30 лет радует ушачан своим творчеством

Культура

Вось ужо 30 год Тамара Дзмітрыеўна Барадзёнак радуе ўшачан сваёй творчасцю. Хто не ведае яе жыццёвых баек, вершаў пра родную старонку? І хоць пісаць яна пачала раней, стартам літаратурнай дзейнасці лічыць першую публікацыю ў “раёнцы” ў 1991-м.

А ўжо праз некалькі год яе творы друкавалі “Віцьбічы” і “Беларуская ніва”, “Звязда” і “ЛіМ”, “Маладосць” і “Вожык”. Т.Барадзёнак была прынята ў Саюз беларускіх пісьменнікаў. За гэтыя дзесяцігоддзі ўбачылі свет больш 20 самвыдатаўскіх зборнікаў вершаў, многія з якіх выпушчаны на базе Ушацкай бібліятэкі. Песняй “Прывітальная” на словы ўшачанкі дзяржаўны ансамбль Віцебскай філармоніі “Талака” пачынае кожнае сваё выступленне, з ёй калектыў аб’ехаў амаль усю Еўропу. Вельмі папулярныя гумарыстычныя творы паэтэсы. Так, брэсцкі народны калектыў “Рабіначкі” шмат год выконвае на канцэртах яе байкі і гумарэскі.

У апошні час творчасць Тамары Дзмітрыеўны аздобіла духоўная лірыка. Пры нядзельнай школе храма ў Арэхаўне выдадзены 2 яе кнігі: зборнік вершаў “Святло душы” і “Сказанне аб жыціі святой вялікапакутніцы Параскевы Пятніцы”. Актыўна далучылася паэтэса і да розных падзей у народным клубе творчых сустрэч “Муза”, прымае ўдзел у прэстыжных літаратурных фестывалях. А яшчэ яна імкнецца захаваць для нашчадкаў народную спадчыну сваёй малой радзімы, таму нядаўна аднавіла два абрады роднай вёскі Матырына – калядны і велікодны, у якіх удзельнічала ў дзяцінстве разам са сваёй матуляй Зінаідай Аляксандраўнай Аўласенка.

Паколькі масавыя мерапрыемствы зараз непажаданыя, юбілей творчай дзейнасці Тамары Барадзёнак наш клуб вырашыў адзначыць у незвычайным фармаце: з гэтай нагоды быў спецыяльна зняты відэаролік, у якім паэтэсу вітаюць розныя людзі і калектывы (паглядзець яго можна ў групах “Музы” і “Патрыёта” ў сацыяльных сетках). Землякі шчыра жадаюць Тамары Дзмітрыеўне поспехаў у творчасці і асабістым жыцці!

Л.ДУНЕЦ, кіраўнік клуба “Муза”.



Добавить комментарий

Ваш e-mail не будет опубликован. Обязательные поля помечены *