Дзень абаронцаў Айчыны і Узброеных Сіл Рэспублікі Беларусь адзначаецца як адно з важнейшых дзяржаўных святаў. І на самой справе яно стала агульнанародным – не толькі былых удзельнікаў Вялікай Айчыннай вайны, але і тых, хто служыў у арміі ў мірны час, сённяшніх вайскоўцаў.
У гэты дзень прадстаўнікі ветэранскай арганізацыі, моладзі, працоўных калектываў райцэнтра сабраліся ля помніка загінуўшым воінам і партызанам, які стаіць у скверы г.п.Ушачы, каб ускласці вянкі, ушанаваць іх памяць.
Там адбыўся мітынг. Прагучаў Дзяржаўны гімн Рэспублікі Беларусь, выступілі раённы ваенны камісар У.Я.Пальчэх і Арцём Качан, які нядаўна вярнуўся дадому са службы ў арміі.
А затым вянкі ляглі да помніка і магіл. Ад раённага выканаўчага камітэта і раённага Савета дэпутатаў вянок усклалі А.А.Кавалёнак і І.М.Падгол.
У гэты ж час вянкі былі ўскладзены да пліт на мемарыяльным комплексе “Прарыў”.
У раённым Доме культуры адбыўся святочны канцэрт.
23 лютага ў цэнтры пазашкольнай работы быў наладжаны канцэрт-віншаванне “Мы славім подзвіг ваш”, прысвечаны Дню абаронцаў Айчыны і Узброеных Сіл Рэспублікі Беларусь. На мерапрыемства былі запрошаны ветэраны вайны і працы з гарпасёлка, а таксама старшыня раённай ветэранскай арганізацыі У.М. Малаткавец.