Лета — гарачая пара не толькі для працаўнікоў сяла, але і для супрацоўнікаў Дзяржаўтаінспекцыі. Менавіта ў перыяд правядзення ўборачнай кампаніі ўзрастае рызыка дарожна-транспартных здарэнняў з удзелам сельскагаспадарчай тэхнікі, прычым неабавязкова іх прычынай з’яўляецца парушэнне правілаў дарожнага руху. Вось і на мінулым тыдні на дарозе каля вёскі Крывушчына трактар МТЗ-2822ДЦ1 з ААТ «Ушацкі райаграсэрвіс» аказаўся ў палоне агню. Не дапамог вадзіцелю нават спраўны вогнетушыцель. Прычынай узгарання стала трапленне гідраўлічнага масла на калектар выхлапной трубы. Вядома ж, вінаватых у названым здарэнні шукаць не прыходзіцца, аднак вядомы выпадкі, калі ў падобных экстранных сітуацыях на дарозе гінулі і атрымлівалі калецтвы людзі, прычыняўся істотны матэрыяльны ўрон гаспадаркам. А ўсё таму, што да кіравання транспартам дапускаліся недысцыплінаваныя вадзіцелі, якія нярэдка знаходзіліся ў нецвярозым стане.
Хочацца звярнуцца да тых, хто зараз знаходзіцца за рулём сельгастэхнікі. Правільна выбірайце хуткасць руху, улічваючы характар грузу і яго размяшчэнне ў кузаве. Змяншайце яе на спусках, звілістых участках дарог, пры запыленай і дрэннай бачнасці, у населеных пунктах, месцах з вялікай колькасцю людзей і ўборачнай тэхнікі. Ажыццяўляючы абгон, пераканаецеся, што манеўрам не створыце перашкод для іншых удзельнікаў дарожнага руху. Час ад часу правярайце тэхнічны стан транспарту.
Ю.ЖАРНАСЕК, начальнік дзяржаўтаінспекцыі.
Понедельник, 29.04.2024
