З 10 красавіка ў краіне стартавала агульнарэспубліканская дабрачынная акцыя “Тыдзень лесу-2010”, якую лесаводы Беларусі прысвячаюць Вялікай Перамозе. Яна накіравана на садзейнічанне ўдзелу шырокай грамадскасці ў вырашэнні задач лесааднаўлення, навядзенне парадку ў лясах і добраўпарадкаванне тэрыторый ляснога фонду.
Ва Ушацкім лясгасе зацверджаны план мерапрыемстваў па правядзенні “Тыдня лесу”. Запланавана ў гэты перыяд пасадзіць 81,9 тысячы адзінак лясных культур на плошчы 12,4 гектара з прыцягненнем каля 70 чалавек з іншых арганізацый і ўстаноў раёна. Будзе праводзіцца і рамонт 9 месцаў адпачынку, плануецца ўбраць 6 несанкцыянаваных звалак таксама з прыцягненнем грамадскасці.
Амаль завершана вялікая работа на плошчы 11,5 гектара па ачыстцы лесу ад захламленасці ўздоўж аўтадарог, якую мы выконваем сіламі работнікаў лясгаса. У названы перыяд у вызначаных кварталах дзяржлесфонду будзе развешана 150 сінічнікаў і шпакоўняў з прыцягненнем да гэтай работы школьнікаў.
Пасля завяршэння ўсіх работ, 24 красавіка, будуць падведзены вынікі “Тыдня лесу”.
М.ЛЁЛЯ,
інжынер па лесааднаўленні ДЛГУ “Ушацкі лясгас”.
