Навучальны год толькі распачаўся, але будучым абітурыентам, якія мараць звязаць жыццё са следчай справай, варта падумаць пра гэта загадзя: афармленне дакументаў, праходжанне медыцынскіх аглядаў патрабуе значнага часу. Аб тым, дзе рыхтуюць будучых следчых, на якіх умовах ажыццяўляецца паступленне і навучанне, расказвае намеснік начальніка Ушацкага РАСК, начальнік следчага аддзялення Сяргей Міхайлавіч ПЛІКАТ:
– Магчымасць стаць следчым ёсць у кожнага, хто мае вышэйшую юрыдычную адукацыю. Для астатніх жа зазначу: профільнай навучальнай установай, якая рыхтуе названых спецыялістаў, з’яўляецца Акадэмія Міністэрства ўнутраных спраў Рэспублікі Беларусь, дзе ёсць следчаэкспертны факультэт. Прыём ажыццяўляецца на конкурснай аснове па выніках цэнтралізаванага тэсціравання. Тэрмін навучання – 4 гады.
Да ўступных іспытаў дапускаюцца асобы ад 17 да 25 гадоў. Не могуць быць прыняты на службу грамадзяне, якія раней учынілі злачынства; не адпавядаюць прафесіі па асабістых, маральных, дзелавых якасцях (вызначыць гэта дапамогуць супрацоўнікі нашага аддзела пасля праведзенай гутаркі); прызнаны недзеяздольнымі або абмежавана дзеяздольнымі; адмовіліся ад праходжання спецыяльнай праверкі; маюць захворванні або іншыя супрацьпаказанні да службы, устаноўленыя ўрачэбнакансультацыйнай камісіяй.
Курсанты Акадэміі МУС забяспечваюцца бясплатным жыллём, харчаваннем, форменным абмундзіраваннем. Яны не падлягаюць прызыву ў армію, а пасля заканчэння навучання ім прысвойваецца афіцэрскае званне “лейтэнант юстыцыі”. Выпускнікі следчаэкспертнага факультэта атрымліваюць гарантаванае працоўнае месца ў падраздзяленнях Следчага камітэта без праходжання папярэдняга адбору і дадатковых іспытаў.
Больш падрабязную інфармацыю пра Акадэмію Міністэрства ўнутраных спраў Рэспублікі Беларусь і следчаэкспертны факультэт можна знайсці на сайце ўстановы: academy.mia.by, па тэлефонах у Віцебску: (80212) 486668, 486627 ці непасрэдна ў раённым аддзеле Следчага камітэта па адрасе: г.п.Ушачы, вул.Савецкая, д.5 (адміністрацыйны будынак ПМК-66).
Падрыхтавала Кацярына КАВАЛЕЎСКАЯ.
