Хай будзе восень жыцця залатой!
Пад такім дэвізам прайшоў у пятніцу ў раённым цэнтры культуры і народнай творчасці канцэрт, прысвечаны цёпламу і сардэчнаму святу – Дню пажылых людзей.
Але называць усіх тых, хто прыйшоў разам правесці час, пажылымі людзьмі не хочацца. Вельмі трапна назвалі іх работнікі маладымі людзьмі сталага ўзросту.
У першай частцы канцэрта прысутных віншавалі і разагравалі сваімі вясёлымі песнямі работнікі раённага цэнтра культуры і народнай творчасці, дзіцячы калектыў “Акварэлькі”.
Другую ж частку мерапрыемства ўзялі ў свае рукі віноўнікі ўрачыстасці – удзельнікі хору народнага клуба “Ветэран”. Як лірычныя, так і вясёлыя песні ў іх выкананні суправаджаліся цёплымі і працяглымі апладысментамі гледачоў. Дарэчы, парадавалі яны не толькі песнямі. Усім спадабалася вясёлая гумарэска пра паход у бальніцу, якую расказала З.Хвошч. А.Курбака прачытаў верш Ніла Гілевіча – якраз у гэты дзень народнаму паэту Беларусі споўнілася б 85 гадоў. Некалькі сольных нумароў выканала В.Лукашонак і іншыя ўдзельніцы калектыву.
Падзяліліся яны з прысутнымі і сакрэтамі сваёй бадзёрасці: “Наш калектыў заўсёды ў страі, мы пяём, а таму і доўга жывём!” А нязменны кіраўнік хору І.Клімава ў сваім віншаванні зазначыла, што не важна, якая лічба ў пашпарце, галоўнае – што ў чалавека ў душы.
Канцэрт атрымаўся насычаным і шчырым. Пажылыя людзі пачулі шмат прыемных слоў, якія прымусілі ў чарговы раз задумацца аб сэнсе існавання на зямлі, зразумець, што ў восені жыцця ёсць нямала сваіх радасцей. А яшчэ для многіх гэта была цудоўная магчымасць сустрэцца разам.
Вольга КАМАРКОВА.
Дзень пажылых людзей разам адсвяткавалі ветэраны працы былога калгаса “Дружба”, сабраўшыся з Рагуцкіх і Звоні, Вашкова і Ільюшына. І калі жыхары аграгарадка дабраліся на святкаванне самастойна, то для падвозу жыхароў іншых вёсак кіраўніцтва ААТ “Ільюшынскі” выдзеліла транспарт. Як і сродкі, каб арганізаваць для ветэранаў салодкі стол, а юбіляраў павіншаваць невялікімі падарункамі. Сёлета 12 работнікаў “Дружбы” адзначаюць круглыя даты. Усіх іх, як і астатніх ветэранаў галіны, запрашала на свята старшыня ветэранскай пярвічкі Т.В.Аўтух. Паколькі 55 ветэранаў старэй 70 гадоў, то не ўсе юбіляры здолелі прыехаць на свята, ім падарункі ўручаць на доме. А вось былога галоўнага бухгалтара і загадчыцу жывёлагадоўчага комплексу Алену Міронаўну Апёнак віншавалі на мерапрыемстве ўсе прысутныя. Для жанчыны год наогул багаты на юбілеі – у маі яны з мужам Пятром Раманавічам сустрэлі залатое вяселле. Песнямі, танцамі і, галоўнае, успамінамі была насычана культурная праграма свята, за якое арганізатары шчыра ўдзячны дырэктару ААТ ”Ільюшынскі” С.А.Халімоненку.
Вольга КАРАЛЕНКА.
