Не адзін дзень працавалі над вось гэтым прыгожым вырабам удзельнікі аб’яднання “Залатая саломка” (кіраўнік Ганна Аляксандраўна Бабянок) пры раённым цэнтры дзяцей і моладзі Лёня Казьянін, Ягор Рудзёнак і Арцём Спірчонак (на здымку). Нагодай для карпатлівай работы стаў раённы конкурс “Выратавальнікі вачыма дзяцей”. Ідэяй, а пасля і назвай работы стаў вядомы верш “Цілі-бом! Загарэўся кошкін дом!” Жыллё старанна майстравалі з саломкі, а вось кошка і выратавальнікі-бабры з машынай – пластылінавыя.
Усяго сёлета на творчы конкурс “Выратавальнікі вачыма дзяцей” было пададзена каля 40 работ, удзел у ім прынялі вучні з усіх школ раёна. Як адзначыла інспектар сектара прапаганды і ўзаемадзеяння з грамадскасцю Ушацкага РАНС К.Карзянок, выявіць самых лепшых, як заўсёды, было няпроста. Перш за ўсё ўлічваліся арыгінальнасць ідэі, паўната раскрыцця тэмы, мастацкае афармленне, акуратнасць. Так, у намінацыі “Малюнак” лепшымі прызнаны работы Варвары Ларчанкі з Ушацкай школы, Ксеніі Мацюшавай з Ільюшынскай, Дар’і Красновай і Валерыі Станевіч з Глыбачанскай. Праявіўшы выдатныя паэтычныя здольнасці, пераможцамі ў намінацыі “Верш” сталі Аляксандра Калягіна з Арэхаўскай школы і Злата Клачок з Вялікадолецкай. Аўтарам лепшага апавядання прызнана Аляксандра Аўтух з Арэхаўскай школы. Ну а перамогу ў намінацыі “Выраб” журы адзінагалосна прысудзіла вышэй прыгаданым хлопчыкам.
Упершыню прапаноўвалася ўдзельнікам конкурсу паспрабаваць свае творчыя здольнасці ў намінацыі “Стыкерпак”. Арыгінальную работу ў гэтым накірунку зрабіў Арцём Качынскі з Ушацкай школы.
Работы пераможцаў раённага этапу адпраўлены ў Віцебск для ўдзелу ў адпаведным абласным конкурсе.
Ну а выратавальнікі тым часам ужо арганізуюць шмат цікавых мерапрыемстваў для падрастаючага пакалення ў рамках прафілактычнай акцыі “Дзень бяспекі. Увага ўсім!”, якая будзе праходзіць у краіне да канца сакавіка.
Вольга КАМАРКОВА.
