Паглядзіце, якога гіганцкага шчупака злавіў на возеры Цвеціна ўшачанін Улад Галімбоўскі. Пацягнуў трафей аж на 10 кіло!
Рыбалкай малады чалавек захапляецца з дзяцінства. Праўда, у Полацку, дзе ён раней жыў, выбірацца на вадаёмы ўдавалася не так часта. Але хлопцу пашчасціла – яго спадарожніца жыцця Вікторыя Карабань аказалася ўраджэнкай нашага азёрнага краю і маладая пара вырашыла абаснавацца на Ушаччыне. Працуе Уладзіслаў зваршчыкам у лясгасе, а вольны час прысвячае любімаму захапленню. За пяць год пасля пераезду ўжо праверыў клёў на многіх ушацкіх вадаёмах. “Бывала, што здабываў рыбу кілаграмаў пад 7, але гэтая – рэкордная”, – зазначае рыбалоў. Увогуле пачатак восені – выдатны час для лоўлі шчупака: надвор’е яшчэ захоўвае рэшткі летняга цяпла і драпежнік трымаецца ў травяных зарасніках, на мелкаводных участках, паступова адыходзячы на глыбіню, актыўнічае ў пошуках корму, таму верагоднасць здабыць дастойны трафей
узрастае.
У іх сям’і стравы з азёрных дароў заўсёды ў меню – рыбу фаршыруюць, робяць рулеты і катлеты, запякаюць у духоўцы. Дзеляцца ўловам і з сябрамі, сваякамі.
Наталля БАГДАНОВІЧ.
