З пачатку 2011 года на дарогах рэспублікі адбылося 438 дарожна-транспартных здарэнняў, дзе загінула 32 дзіцяці, 444 – атрымалі цялесныя пашкоджанні. Толькі ў Віцебскай вобласці зарэгістравана 58 ДТЗ з удзелам дзяцей, у якіх чацвёра маленькіх грамадзян загінулі, 57 – атрымалі траўмы рознай ступені цяжкасці. З удзелам дзяцей-пасажыраў адбылося 19 аварый – адно дзіця загінула, 21 – паранена. Лічбы статыстыкі палохаюць.
Каб папярэдзіць аварыі з удзелам дзяцей, Дзяржаўтаінспекцыя вобласці праводзіць з 20 па 30 кастрычніка 2011 года дэкаду “Дзіця – галоўны пасажыр!” У яе рамках супрацоўнікі ДАІ выступяць у працоўных калектывах, растлумачаць правілы бяспечнай перавозкі дзяцей. У вадзіцеляў будзе магчымасць атрымаць не штраф, а прызы. Дзеля гэтага давядзецца запоўніць анкеты, якія стануць своеасаблівымі заяўкамі на ўдзел у розыгрышы падарункаў (на здымку).
Сур’ёзныя траўмы падчас сутыкненняў аўтамабіляў атрымліваюць дзеці, якія знаходзяцца не ў спецыяльных сядзеннях. Выкарыстанне дзіцячых аўтамабільных крэслаў можа зменшыць рызыку атрымання дзецьмі траўм на 70-90 працэнтаў. Калі вы клапоціцеся аб бяспецы вашага маленькага пасажыра, набывайце аўтакрэслы.
Неабходна выконваць наступныя правілы: зачыняць дзверы аўтамабіля на ахоўную зашчапку, не пакідаць цяжкія і вострыя прадметы на заднім сядзенні, бо ў момант сутыкнення або рэзкага тармажэння яны могуць траўміраваць дзіця. Нельга дазваляць маленькаму пасажыру падчас руху стаяць на заднім сядзенні: ён можа пераляцець праз спінку і стукнуцца аб пярэдняе шкло або панэль.
Што ў нас на чашы шаляў? На адной – каля 150 долараў (столькі ў сярэднім каштуе дзіцячае аўтакрэсла). На другой – здароўе і жыццё дзіця. Калі аўтааматар можа дазволіць сабе набыццё аўтамабіля, няўжо ён не знойдзе грошы на дзіцячае сядзенне?
А.ЛІСОЎСКІ,
старшы дзяржаўтаінспектар ДАІ.