Ушацкі лясгас на гэтым тыдні стаў адной з пляцовак правядзення выязнога пасяджэння калегіі Міністэрства лясной гаспадаркі. Лесаводы з усёй краіны прыехалі на Віцебшчыну не толькі для абмеркавання вытворчых пытанняў, а і для пераймання вопыту.
Адной з ключавых тэм рэспубліканскай нарады стала добраўпарадкаванне. Гэтаму пытанню ўшачане ўдзяляюць увагу пастаянна, ну а сярод эталонных аб’ектаў – Ушацкае лясніцтва. Падраздзяленне стала першым у маршруце наведвання выязной часткі нарады. Стану вытворчай базы, парадку на тэрыторыі госці паставілі высокую ацэнку.
Усе мы ведаем, што ў ідэальным парадку калектыў лясніцтва падтрымлівае не толькі прылеглую тэрыторыю, а і дэндрапарк, які з’яўляецца любімым месцам адпачынку ўшачан. Прайшліся ўдзельнікі калегіі і па нядаўна створанай экасцежцы. Дарэчы, падобнымі праектамі могуць пахваліцца далёка не ўсе лясгасы краіны, а таму кіраўнікі прадпрыемстваў бралі вопыт нашага на ўзбраенне.
Як ва Ушацкім лясгасе развіваюць дрэваапрацоўку, каб мець добрую выручку, было наглядна паказана ў дрэваапрацоўчым цэху. Штомесяц сюды паступае не менш за 2800 кубаметраў драўніны, вырабляецца ад 1100 кубаметраў піламатэрыялаў, у тым ліку каля 850 кубаметраў – на экспарт. Ушачане ў ліку лідараў сярод прадпрыемстваў галіны па вытворчасці домакамплектаў. Два гады таму ўведзены ў эксплуатацыю станок для вырабу ацыліндраванай драўніны. Асвоіўшы тэхналогію, выканалі першы заказ і пераканаліся, што гэта перспектыўны напрамак: драўляныя домакамплекты запатрабаваныя, попыт на зрубы расце, а таму лясгас набыў яшчэ адзін падобны станок.
Наведалі ўдзельнікі калегіі і лесапітомнік лясгаса. Аб’ект быў уключаны ў маршрут невыпадкова. Па-першае, тут многае зроблена па добраўпарадкаванні і мадэрнізацыі, па-другое, ушачанам сапраўды ёсць чым пахваліцца. Пітомнік цалкам забяспечвае патрэбы лясгаса ў якасным пасадачным матэрыяле, развіваюць і дэкаратыўны накірунак.
Паглядзелі калегі з іншых рэгіёнаў і як ідзе будаўніцтва новай лесагаспадарчай дарогі Азаранкі-Бараўцы. Яна патрэбна прадпрыемству як для выканання вытворчых задач, так і ў мэтах бяспечнай пажарнай абстаноўкі. Работы выконвае “Віцебскмеліяводгас”, поўная здача аб’екта ў эксплуатацыю адбудзецца ўжо ў бягучым годзе.
На пленарнай частцы калегіі, якая прайшла ў райвыканкаме, міністр лясной гаспадаркі Аляксандр Кулік запатрабаваў ад кіраўнікоў на месцах надаваць прынцыповую ўвагу пытанням добраўпарадкавання. Кіраўнік ведамства адзначыў, што ў гэтым плане падцягнуцца трэба гродзенскім лесаводам, і нягледзячы ні на якія цяжкасці, усім прадумваць праграмы на перспектыву: “Нам не патрэбны палацы, нам патрэбны годныя ўмовы працы і быту для людзей! Няхай гэта будзе лесавод, майстар лесу ці ляснічы”.
У цэнтры ўвагі аказаліся таксама пытанні прафілактыкі правапарушэнняў у галіне і выканання даручэнняў Кіраўніка дзяржавы.
Міністр лясной гаспадаркі Аляксандр Кулік: “У рамках Года добраўпарадкавання ахопліваем шырокі фронт работ: пачынаючы ад добраўпарадкавання адміністрацыйных будынкаў і заканчваючы сацыяльнымі праектамі. Асаблівая ўвага – санітарнаму стану лесфонду, абсталяванню месцаў адпачынку, устаноўцы нагляднай агітацыі на прыродаахоўную тэматыку”.
Вольга КАМАРКОВА.
