Злачынствы, якія здзяйсняюцца блізкімі, адносяцца да ліку бытавых. Падштурхоўвае ж да іх звычайна п’янства: сістэматычнае ўжыванне спіртнога паслабляе самакантроль чалавека – ён праяўляе жорсткасць, агрэсію, дапускае амаральныя ўчынкі.
У маі бягучага года незаконна прабраўся ў дом да суседа, з якім падтрымліваў сяброўскія адносіны, жыхар адной з вёсак Ушацкага раёна. Як адчыняюцца ўваходныя дзверы, ён ведаў. Як і тое, што да пажылога чалавека рэгулярна прыходзіць сацыяльны работнік, які прыносіць усё неабходнае з магазіна. Разлічваючы знайсці спіртное, злодзей і прыйшоў. Пошукі, праўда, чаканага выніку не прынеслі – і каб не вяртацца з пустымі рукамі, набраў з халадзільніка прадуктаў харчавання на суму звыш 45 рублёў.
Дзякуючы аператыўнай рабоце праваахоўнікаў, злачынства было раскрыта па гарачых слядах. Як высветлілася, нецвярозы мужчына прынёс выкрадзенае сабе дамоў, аднак з’есці не паспеў – заснуў.
Па выніках разгляду справы абвінавачанаму прызначана пакаранне ў выглядзе штрафу, памер якога ў 30 разоў перавышае суму выкрадзенага, а таксама прымусовае лячэнне ад алкагалізму.
Аксана МІШУТА, старшыня суда Ушацкага раёна
