У непрыемную сітуацыю трапілі напачатку лістапада жыхары адной з вёсак Ушацкага раёна. Пасля невялікага застолля сужыцелі прылеглі адпачыць, пры гэтым дзверы ў хату пакінулі незачыненымі. Гасцей яны не чакалі, тым больш агрэсіўных…
Іх знаёмы 1959 года нараджэння, які нечакана з’явіўся на парозе, адразу пачаў выказваць прэтэнзіі ў адрас значна маладзейшай за сябе жанчыны. Маўляў, тая актыўна распаўсюджвала непрыстойныя чуткі пра яго – і гэтая інфармацыя дайшла да яго жонкі.
Стрымаць эмоцыі госць не мог – дастаў з кішэні нож і з пагрозай забіць кінуўся да “разбуральніцы сямейнага ачага”. На шчасце, прыводзіць свае словы ў дзеянне не стаў, чаму пасадзейнічалі ў тым ліку ўгаворы сужыцеля грамадзянкі.
Калі вясковец урэшце супакоіўся і сышоў, жанчына выклікала міліцыю. У адносінах дагэтуль не судзімага мужчыны (як ён пазней прызнаўся, на злачынства яго падштурхнуў алкаголь) узбуджана крымінальная справа па арт.186 КК Рэспублікі Беларусь, санкцыя якога прадугледжвае да трох гадоў пазбаўлення волі.
Віктар КАЗЛОЎСКІ, начальнік Ушацкага раённага аддзела Следчага камітэта
