Ужо з панядзелка ў краіне ўступаюць у сілу сезонныя патрабаванні да аўтамабільных шын. Гэта значыць, што да пачатку вясны ўсе транспартныя сродкі павінны быць абсталяваны зімняй гумай.
– Своечасовая падрыхтоўка аўтамабіля да зімы – гэта не фармальнасць, а жыццёва важная мера перасцярогі, – нагадвае начальнік аддзялення ДАІ Мікалай Гаўрылюк. – Ужо пры тэмпературы каля +5°C летнія шыны пачынаюць цвярдзець, а пры нулі і ніжэй “дубеюць” – счапленне з дарогай рэзка падае. У выніку тармазны шлях павялічваецца і нават на невялікай хуткасці могуць узнікаць заносы. Зрэшты, не любыя зімнія шыны прыгодныя для эксплуатацыі ў халодны сезон. Глыбіня малюнка пратэктара ў іх павінна быць не менш за 4 мм. Маюць шыны і тэрмін прыдатнасці – не больш 5 гадоў з моманту вырабу.
Вадзіцелям трэба перастроіцца на зімовы стыль ваджэння, захоўваць бяспечную дыстанцыю і бакавы інтэрвал, не дапускаць рэзкіх манеўраў, тармажэнняў, не перавышаць хуткасны рэжым.
Рэйды супрацоўнікаў аддзялення ДАІ на Ушаччыне на гэтым тыдні паказалі, што вадзіцелі адцягваць “пераабуванне” транспарту не сталі. Як толькі на вуліцы пачало падмарожваць, многія паспяшаліся на станцыі тэхабслугоўвання. А некаторыя ўвогуле ездзяць на “зіме” ўвесь год.
За невыкарыстанне зімніх шын ці зношаны пратэктар можна атрымаць папярэджанне або штраф да 1 базавай велічыні. За паўторнае на працягу года ігнараванне патрабавання – ад 2 да 5 базавых.
Кацярына КАВАЛЕЎСКАЯ
