Заваёўваць згубленую аўдыторыю складаней, чым пакараць упершыню. І нашым кааператарам, якія балавалі адкрыццём новых магазінаў, шырокім асартыментам уласнай прадукцыі, утульнасцю і таннасцю страў у кропках грамадскага харчавання, пасля часоў жорсткага дэфіцыту тавараў складана вяртацца на былыя пазіцыі. Аднак яны да гэтага імкнуцца. У чым мы і пераканаліся, завітаўшы ў кафэ “Папараць-кветка”.
Абеды, сняданкі тут гатавалі пастаянна, прычым, як і раней, утрымліваючы асартымент. І супоў не менш двух, і чатыры “другія стравы” – кожны дзень. Толькі выбар салатаў змяншаўся, бо не было свежых памідораў, марынаваных агуркоў, кукурузы. Цяпер усе гэтыя складнікі ў наяўнасці, плюс ананасы, масліны, шампіньёны… І ў кафэ зноў на вашых вачах гатуюць піцу на любы густ – у меню 12 гатункаў.
Выпуск піцы аднавілі на мінулым тыдні, і з першага дня з’явіліся пакупнікі. У сераду ў палове пятай застала там двух юных наведвальнікаў, якія пасля працяглых ўрокаў з задавальненнем елі румяныя кавалкі: “Смачная, мы часта тут перакусваем і паспыталі розныя віды. Сёння ўзялі фірменную”.
З курацінай і не самая танная – каля 10 рублёў – яна носіць назву кафэ – “Папараць-кветка”. Аднак палова асартыменту ў цанавым дыяпазоне 5,6-8 рублёў. Напрыклад, “Сытная” са свінінай каштуе ўсяго 6.83 рублі, а за самую дарагую з вяндлінай і грыбамі вы аддадзіце 13.30.
У піцах у гарпасёлку недахопу няма. Замарожаную можна купіць у любым магазіне, а ў “Санце”, як і ў “Папараць-кветцы”, яе прыгатуюць на вашых вачах. Аднак перавага апошняй установы ў тым, што толькі тут можна сесці на канапу і няспешна правесці час, далучыўшы да сытнай выпечкі каву, гарбату і любыя іншыя напіткі. Не хапіла на кампанію адной порцыі, за 10 хвілін на стале з’явіцца дадатковая. А паколькі працуе кафэ з 8 да 18 (у суботу і нядзелю – з 10 да 18), піца можа быць на сняданак, абед ці вячэру.
Повар Таццяна Сямёнаўна Крацёнак пачала гатаваць піцы прыкладна праз два гады пасля таго, як сталовая ў 2017-м ператварылася ў кафэ і набылі спецыяльнае абсталяванне. І той час, калі чэргі стаялі да дзвярэй, памятае. У спецыяльную прагрэтую печ адразу можа памясціць дзве піцы. Пакуль выпякаюцца гэтыя порцыі, паспяваюць прыгатаваць другія. Тонка раскатвае дражджавое цеста – уласнае, якое штодня вырабляецца кааператарамі для рознай выпечкі, а таксама паступае ў продаж у “Кулінарыі”. Яно змазваецца, закладаюцца патрэбныя інгрэдыенты, пасыпаюцца сырам… І вось прыгожыя яркія “аладкі” кладуцца на драўляную “талерку” і спецыяльным нажом рэжуцца на кавалкі. У такім відзе і на такой падстаўцы вы яе і атрымаеце за сталом, а пры жаданні возьмеце з сабой у спецыяльнай упакоўцы.
Грамадскае харчаванне, як і ўвесь гандаль, залежыць ад наяўнасці тавараў. З прыходам у Віцебскае аблспажыўтаварыства новага кіраўніка, сітуацыя істотна змянілася. Як паведаміла нам начальнік гандлёвага аддзела Людміла Іванаўна Каваленка, заяўкі выконваюцца без перабояў, а на паліцах не толькі тавары першай неабходнасці, як запалкі (якіх таксама не было), але і курыца Віцебскай бройлернай птушкафабрыкі ад тушкі цалкам да разробленай, рыба розных відаў, цукеркі ўсіх асноўных беларускіх вытворцаў, “малочка” ў асартыменце, цыгарэты. Ды і геаграфія паставак пашырылася, напрыклад, каўбасы паступаюць не толькі ад усіх вытворцаў сістэмы аблспажыўтаварыства і камбінатаў-партнёраў з Глыбокага, Віцебска, Магілёва, аднак з Ашмян, Слоніма, якіх раней ніколі не было. Ну а той сектар, які залежаць непасрэдна ад сябе, у філіяле і не прасядаў. Пад поўную патрэбу назапашана агародніна, заўсёды на паліцах яблыкі, не зніжаюць і выпуск уласнай гатовай прадукцыі.
Вольга Караленка.
