Даўно Завячэльскі ФАП не прымаў у сваіх сценах столькі людзей. Праўда, спяшаліся яны сюды не за атрыманнем медыцынскай дапамогі. Разам з кіраўніцтвам раённага і сельскага выканаўчых камітэтаў на сустрэчу з насельніцтвам у аўторак завітаў галоўны ўрач Ушацкай цэнтральнай раённай бальніцы Ю.В.Пацёмкін.
Тэма для абмеркавання была сур’ёзная: даступнасць і якасць медабслугоўвання на сяле. Як адзначыў Юрый Валянцінавіч, мясцовы ФАП – адзін з самых невялікіх у раёне па колькасці пацыентаў: на яго абслугоўванні знаходзіцца зараз каля 90 чалавек, большасць з якіх – жыхары Завячэлля. Будынак ужо не адпавядае вызначаным санітарным нормам, ды і з кадрамі ёсць праблема: пастаяннага фельчара тут даўно няма. Аднак без неабходнай меддапамогі вяскоўцы ўсё роўна не застаюцца: прыём ажыццяўляюць медыкі з Дубраўскай урачэбнай амбулаторыі. Дзякуючы іх плённай рабоце, удалося дасягнуць амаль стапрацэнтнага паказчыка па праходжанні мясцовымі жыхарамі дыспансернага агляду. А таму калі ва
Ушацкай ЦРБ складалі маршрут руху новага перасоўнага фельчарска-акушэрскага пункта на лістапад, гэтыя населеныя пункты ў пералік не ўключалі.
“Такому сучаснаму медыцынскаму комплексу мы б, канечне, таксама парадаваліся”, “У камфортных умовах з фельчарам параіцца, лекаў купіць, неабходныя аналізы здаць – што яшчэ трэба?”, – казалі прысутныя. Зрэшты, іх пажаданні ўлічылі – Ю.Пацёмкін распарадзіўся са студзеня ўключыць Завячэлле ў графік работы перасоўнага ФАПа.
Кацярына КАВАЛЕЎСКАЯ
