На палях поўным ходам разгарнуліся работы, паралельна з сяўбой вядзецца падкормка азімых. Асаблівасцямі сёлетняй пасяўной мы пацікавіліся ў начальніка райсельгасхарча Ю.М.ЛАДНОВАЙ.
– Юлія Міхайлаўна, па-першае, хацелася б даведацца пра прыярытэты сёлетняй кампаніі.
– Я б вылучыла дзве асаблівасці, якія накіраваны на адно – паляпшэнне кармавой базы. Павялічаны пасяўныя плошчы пад кукурузу – 1705 гектараў будуць засеяны на сілас і 1000 – на зерне. Паспрабуем рыхтаваць у тым ліку плюшчанае зерне – у “Вялікадолецкім” ёсць абсталяванне для закладкі яго ў поліэтыленавы рукаў. Таксама для атрымання больш бялковага корму сёлета з абласнога бюджэту выдзелены сродкі на набыццё насення люцэрны, якая будзе пасеяна на 100 гектарах, каб і ў далейшым пашыраць плошчы гэтай пяцігадовай травы. Што датычыцца зерневых, то ў прыярытэце яравая пшаніца.
– Наколькі гатовы раён да сяўбы?
– Пад поўную патрэбу маем насенне, у тым ліку і эліты. Ніякіх праблем няма з палівам. Што да тэхнікі, то два энерганасычаныя трактары яшчэ знаходзяцца на рамонце на заводах, аднак паступілі новыя адзінкі і гэтага дастаткова, каб закончыць сеяць у аптымальныя тэрміны. Вырашана кадравае пытанне – за штурваламі знаходзяцца пераважна работнікі гаспадарак, на пасяўной задзейнічаны толькі восем механізатараў з прадпрыемстваў раёна.
– У гаспадарак звычайна не стае ўласных грошай на шматлікія веснавыя работы. За чый кошт набывалася ўсё неабходнае?
– Не абышлося без выдзялення бюджэтных сродкаў, і сёлетнюю падтрымку дзяржавы можна назваць беспрэцэдэнтнай. Напрыклад, тры апошнія МТЗ-3522 – больш прадукцыйныя і пры тым эканомныя ў параўнанні з папярэднімі мадэлямі – фактычна падарунак, бо атрыманы не ў лізінг, з адтэрміноўкай аплаты, як у папярэднія гады, а за бюджэт. Вялікая падтрымка ў выдзяленні шэрагу высокапрадукцыйнай тэхнікі аказана не толькі Ушаччыне, але і гаспадаркам усёй Віцебскай вобласці. Не думаюць нашы сельгаспрадпрыемствы і за што купляць паліва – дызельнае яны атрымліваюць таксама за кошт бюджэтнага займу. Ды і раённая ўлада падставіла плячо – выдзелена 150 тысяч на падрыхтоўку тэхнікі і 90 – на закупку насення эліты.
- Віцебскай вобласці па ўказу Прэзідэнта выдзелены бюджэтныя сродкі на набыццё сельскагаспадарчай тэхнікі. З канца мінулага года і сёлета гаспадаркі Ушацкага раёна бязвыплатна атрымаюць: тры МТЗ-3522, камбайн, два Амкадоры-352 з аддзяляльнікам сіласу, па два кормараздатчыкі і культыватары КПС-10, дзве шыроказахопныя сеялкі “Беразіна”, касілку-плюшчылку, дзевяцікорпусны плуг, раскідвальнік цвёрдых угнаенняў. Акрамя гэтага паэтапна вядзецца пагашэнне запазычанасці за атрыманую раней у лізінг тэхніку – на гэтыя мэты ўжо пайшло 2 мільёны 400 тысяч рублёў.
– У зводцы з’явіліся новыя прадпрыемствы. Каму перададзены ўшацкія землі?
– “Палімір-Агра” будзе апрацоўваць 1140 гектараў на тэрыторыі былога КУСГП “Глыбачаны”, а таксама ўздоўж трасы ў накірунку на Полацк. Участак “Дабея” – гэта структура “Віцебскаграпрадукта”, якая створана ў суседнім Шумілінскім раёне, хаця 840 га за Дубраўкай яны апрацоўвалі і раней. Гэтыя плошчы абедзьве гаспадаркі будуць выкарыстоўваць пад сяўбу траў, кукурузы і іншых кармавых культур. Лічы што палова ворыўных зямель раёна зараз размеркавана паміж “Сафійскімі дарамі” і “Вялікадолецкім”, а самай маленькай гаспадаркай аказаўся “Ільюшынскі”.
– Зараз ужо можна дакладна сказаць, як перазімавалі азімыя культуры?
– Мы праводзілі інвентарызацыю, ёсць невялікія ўчасткі, пашкоджаныя дзікай жывёлай, а таксама з гібеллю, якая адбылася з-за “падпаркі”. Аднак спісання пакуль не рабілі. Кропка росту на рапсе, напрыклад, не закранута – чакаем, што расліны раскусцяцца, тым больш што ўсе крыжакветныя і 80 працэнтаў зерневых ужо падкормлена азотнымі ўгнаеннямі.
– Дзякуй Вам за размову і няхай наступны сезон будзе паспяховым.
Вольга Караленка.
