Кожны год пачатак ацяпляльнага сезона з’яўляецца перыядам ўсплёску пажараў. Толькі ўдумайцеся ў гэтыя лічбы: за дзесяць дзён – з 20 па 30 кастрычніка ў рэспубліцы адбылося 218 пажараў, на якіх загінуў 41 чалавек! З 16 пажараў, што адбыліся з пачатку года на Ушаччыне, 3 прыходзіцца на кастрычнік.
Сагрэцца і не згарэць
Як толькі халадае на вуліцы, у дамах пачынаюць інтэнсіўна тапіць печы. Часам даходзіць ледзьве не да кругласутачнага рэжыму, і ў выніку многія кладкі ці дымаходы не вытрымліваюць перагрэву. Па статыстыцы кожны пяты пажар адбываецца зза няправільнай эксплуатацыі печаў. Менавіта па гэтай прычыне ў мінулыя выхадныя ў Маладзечанскім раёне абарвалася жыццё 30гадовага мужчыны і яго пяцігадовага сына. Мужчына з дзіцём засталіся на ноч у сваім дачным доме, а раніцай хацелі вярнуцца дадому ў Мінск, але, на жаль, не прачнуліся. У адзін момант перакрэслілася шчаслівае жыццё добранадзейнай маладой сям’і… Спіс трагічных выпадкаў, на вялікі жаль, можна працягваць.
Гэтай парой людзі саграваюцца не толькі з дапамогай пячнога ацяплення. Не менш распаўсюджанай прычынай пажараў з’яўляецца і выкарыстанне электраабагравальнікаў. Небяспечна пакідаць уключанымі іх на ноч, сушыць на іх рэчы. Акрамя гэтага абагравальнік з’яўляецца вельмі магутным прыборам, таму, выкарыстоўваючы яго, трэба ўлічваць агульную нагрузку на электрасетку – уключаць яго адначасова з мікрахвалевай печчу, пральнай машынай, тэлевізарам не варта. Каб пазбегнуць узгарання электраабсталявання зза перападаў напружання, карыстайцеся сеткавымі фільтрамі. Сачыце за тым, каб разеткі не награваліся, бо гэта першая прыкмета няспраўнасці ці перагрузкі сеткі, што, адпаведна, можа прывесці да кароткага замыкання. Адна з галоўных запаведзей бяспекі – не пакідаць уключаныя прыборы без нагляду. У зводках МНС нескладана знайсці выпадкі, калі прычынай пажараў з’яўляецца парушэнне правіл эксплуатацыі электрапрыбораў, напрыклад, тэлевізары, пакінутыя ў рэжыме чакання, ці падключаныя да сеткі зарадныя ўстройствы. Дарэчы, за прыкладамі далёка хадзіць не трэба. У пачатку кастрычніка пажар, які адбыўся зза няправільнай эксплуатацыі абсталявання ў адной з кватэр па вуліцы Савецкай, 2 прымусіў пахвалявацца і пацярпець нязручнасці ўсіх жыльцоў дома. Салодкі сон уначы прыйшлося перарваць і некаторы час правесці на вуліцы – выратавальнікі эвакуіравалі жыхароў шматпавярхоўкі. На шчасце, абышлося без ахвяр, гаспадыня кватэры не пацярпела, чаго не скажаш пра яе маёмасць.
Курэнне можа загубіць
Курэнне ў жылых памяшканнях – асобная тэма і асаблівая бяда. Вялікая доля пажараў адбываецца па гэтай прычыне. Прыкладам таму – нядаўні выпадак, калі закурыў у доме і заснуў жыхар Новага Сяла. Выжыць яму пашчасціла, а вось ад дома практычна нічога не засталося.
У рэйды па Ушаччыне
Каб папярэдзіць узнікненне пажараў і гібель людзей на іх у пажаранебяспечны асенні перыяд, Міністэрства па надзвычайных сітуацыях з 17 кастрычніка па 11 лістапада праводзіць пажарнапрафілактычную акцыю “За бяспеку разам!”
На Ушаччыне ў час акцыі праходзяць рэйды па праверцы стану жылых памяшканняў грамадзян, у першую чаргу адзінокапражываючых, інвалідаў, нядобранадзейных сямей. Акрамя супрацоўнікаў раённага аддзела па надзвычайных сітуацыях у рэйдавыя рабочыя групы ўваходзяць прадстаўнікі энерганагляду, аддзела ўнутраных спраў, тэрытарыяльнага цэнтра сацыяльнага абслугоўвання насельніцтва, райгаза. Асаблівая ўвага ў ходзе абследавання ўдзяляецца стану пячнога ацяплення, электраправодкі, газавага і электрычнага абсталявання, наяўнасці і спраўнасці аўтаномных пажарных апавяшчальнікаў, а таксама ўмовам пражывання дзяцей. На мінулым тыдні, напрыклад, рэйдавая група наведала вёскі Вялікадолецкага сельсавета. У дамах вяскоўцаў было выяўлена не адно парушэнне: трэшчыны ў печах, складзіраванне рэчаў на іх, старая праводка і іншае. Замест пакарання ўсім былі вынесены папярэджанні і праведзены тлумачальныя размовы, якія, будзем спадзявацца, паўплываюць на жыхароў.
У рамках акцыі супрацоўнікі раённага аддзела па надзвычайных сітуацыях праводзяць сустрэчы і ў працоўных калектывах Ушаччыны. Тэма сходаў усё тая ж – пажарная бяспека.
Прафілактыка патрэбна
Многія лічаць, што падобныя прафілактычныя мерапрыемствы не патрэбны і паўтараць элементарнае “не курыце ў ложку!”, “не пакідайце дзяцей адных”, “выконвайце правілы пажарнай бяспекі” не мае сэнсу. Аднак менавіта дзякуючы мэтанакіраванай прафілактыцы за апошнія гады ўдалося змяніць сітуацыю: у 2010 годзе ў рэспубліцы загінула 1110 чалавек (!), у 2014м – 737, у 2015 – 579. Тэндэнцыя на памяншэнне трагедый захоўваецца і ў бягучым годзе. На Ушаччыне таксама назіраецца змяншэнне колькасці пажараў і загінуўшых на іх. Так, у 2011 годзе адбылося 40 пажараў і загінула 11 чалавек, у 2012м – 31 пажар і 7 загінуўшых, у 2013м – 25 пажараў і 6 ахвяр. Сёлета ў раёне з пачатку года адбылося 16 пажараў, гібелі людзей не зарэгістравана. А значыць, прафілактыка дае эфект і трэба абследаваць, правяраць, яшчэ і яшчэ папярэджваць.
З пачатку года ў краіне адбылося 4566 пажараў, на якіх загінула 402 чалавекі, з іх сямёра дзяцей, 275 чалавек траўміраваны, агнём пашкоджана 3561 пабудова.
Вольга КАМАРКОВА.